Kandidatu traballadór timor-oan ba Koreia Súl. Imajen/SEFOPE

DILI, 15 setembru 2021 (TATOLI)–Kandidatu traballadór timor-oan  na’in-500 husu ba Governu atu buka dalan hodi transporta sira ba Koreia, tanba iha ona kontratu serbisu ho Governu koreanu no empreza maibé to’o agora seidauk desloka ba Koreia Súl.

Tuir Portavóz kandidatu traballadór, Filipe Hau Katorze, kadidatu sira pasa ona iha  prosesu teste no empreza ne’ebé atu ba serbisu haruka ona kontratu no hein de’it serbisu.

“Ami ne’ebé durante ne’e tuir kursu lian koreia, tuir ona ezame iha tinan 2019 no tinan 2020 sira pasa ona hanesan traballadór atu ba serbisu iha Koreia Súl, maibé to’o agora seidauk deskloka besik tinan-rua ona, tanba ne’e  hakarak husu ba Embaxadór Koreia iha Timor-Leste, Primeiru-Ministru no SEFOPE atu aselera ami-nia prosesu hodi bele desloka lalais,” Portavóz hateten liuhosi konferénsia imprensa ne’ebé maka hala’o iha SEBAE Becora, kuarta ne’e.

Nia dehan, daudaun ne’e parte SEFOPE haruka traballadór sira hein de’it, maibé la esplika razaun tanba sa maka traballadór atraza.

“SEFOPE nunka fó liafuan di’ak ba ami,  ne’e maka ami hakarak  husu ho haraik-an atu aselera ami-nia desklokasaun hodi bele to’o lalais, tanba daudaun ne’e nasaun sira ne’ebé haruka nia traballadór bá serbisu iha Koreia ne’e hahú ba ona, maibé Timor-Leste seidauk,” nia akresenta.

Notísia relevante: SEFOPE simu ona kontratu traballadór 500 hosi Governu koreanu

Rekezitu hosi Governu Koreia ba Timor-Leste, kuandu traballadór ida atu aranka tenke halo teste swab no hela iha kuarentena durante loron 14 molok aranka.

“Rekezitu hirak ne’e ami prontu kolabora. Kuandu kandidatu traballadór timor-oan na’in-500 semana ne’e seidauk hetan solusaun, ami sei halo asaun greve iha SEFOPE Becora,” nia hatutan.

Hatan kona ba kestaun ne’e, Diretór Empregu Exteriór SEFOPE, Filomeno Soares, hateten, daudaun parte Governu Koreia seidauk bele autoriza traballadór Timor-Leste ba serbisu tanba situasaun COVID-19 no voo aviaun.

“Sira foin daudaun fó rekezitu balun, bainhira Timor-Leste halo tuir ona ida-ne’e, ita bele haruka ita-nia traballadór, tanba ita hatene regulamentu Koreia nian rigór liu, la’ós ita maka lakohi haruka. Daudaun ne’e seidauk iha voo komersiál maibé voo charter de’it, ida-ne’e maka sai problem boot ba Timor-Leste,” nia subliña.

Maski nune’e, SEFOPE kontinua buka esforsu hodi haruka traballadór timor-oan ba serbisu Koreia.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here