Diretór Jerál SEFOPE, Paulo Alves. Imajen TATOLI/Francisco Sony

DILI, 15 jullu 2021(TATOLI)—Diretór Jerál Sekretaria Estadu Formasaun Profisionál no Empregu (SEFOPE), Paulo Alves, hateten, Governu koreanu haruka ona kontratu serbisu traballadór timor-oan ne’ebé sei serbisu iha área peska no fábrika.

“Foin daudaun sira haruka ona kontratu ema na’in-500 atu bá servisu iha Korea do Súl, maibé Korea rasik agora ne’e iha ona variante delta ne’ebé halo númeru infesaun sa’e maka’as, tanba ne’e sira suspende ita-nia atividade hotu atu tama bá sira-nia rai,” Diretór informa iha salaun Komisaun Nasionál Eleisaun (CNE, sigla portugés), Colmera, kinta ne’e.

Notísia relevante: SEFOPE-MS sei diskute rekezitu foun Korea Súl transporta traballadór 100

Governu koreanu suspende mós entrada nasaun neen ne’ebé atu haruka sira-nia traballadór.

“Agora daudaun traballadór ne’ebé kontratu iha ona tuir hela formasaun prelemináriu, tanba ne’e hein variante foun COVID-19 ne’e menus maka sira bele haruka traballadór ba serbisu,” nia akresenta.

Aleinde ne’e, iha mós traballadór timor-oan 100 ne’ebé tuir planu sei dezloka bá Korea Súl iha loron 02 jullu, maibé la konsege tanba nasaun ne’e impoin regra foun iha ámbitu pandemia.

Hahú tinan 2009 to’o 2020, traballadór timor-oan hamutuk 3.696 mak serbisu ona iha Korea Súl iha área peska, fábrika no agrikultura.

Jornalista : Natalino Costa

Editora      : Julia Chatarina

HAKEREK NO HATÁN

Please enter your comment!
Please enter your name here