Diretór Estabelesimentu Prizaun Becora, João Domingos. Imajen Tatoli/Dok.

DILI, 27 agostu 2021 (TATOLI)—Estabelesimentu Prizaun Becora suspende atividade vizita família hahú 27 agostu, tanba Governu impoin konfinamentu domisiliáriu jerál ba populasaun iha Dili.

Suspensaun ne’e bazeia ba orientasaun hosi Ministru Justisa (MJ), Manuel Cárceres da Costa, inklui suspende atividade relijioza ba populasaun prizionál-sira iha prizaun Becora, hodi evita transmisaun COVID-19.

Notísia relevante:Governu aplika hikas konfinamentu domisilariu iha Dili hahú 27 agostu

“Hahú ohin prizaun Becora hato’o ba públiku temporáriu, hodi suspende atividade sira-ne’e to’o despaixu ministru-nian fós-sai ka depende ba informasaun foun,” Diretór Prizaun Becora, João Domingos, hateten ba jornalista Agência Tatoli, via WhatsAap, sesta ne’e.

Parte prizaun mós suspende atividade sosiál hosi organizasaun governamentál-sira ba iha prizaun laran, exeptu vizita entidade importante-sira ne’ebé dekreta iha artigu 68, 69 no artigu 70, dekretu lei númeru 14/2014 rejime ezekusaun penál.

Tuir dadus, prizaun Becora iha dadur hamutuk 523, hosi númeru ne’e 511 mak simu ona vasina, kompleta ona vasina doze daruak na’in 495 no vasina doze dahuluk na’in 16.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here