Komunidade simu vasina Sinovac husi pesoál saúde iha Sentru Saúde Comoro, segunda (13/09/21). Imajen Tatoli/António Gonçalves.

DILI, 15 setembru  2021 (TATOLI)—Sala Situasaun Sentru Integradu Jestaun Krize (SIJK) rejista kazu ema mate ho COVID-19, hamutuk na’in-rua no kazu ativu hamutuk 2.756.

Totál óbitu ne’ebé relata  ohin, dahuluk mane ida ho idade 44, hela iha Dili, vasina seiduak kompletu, iha 13 setembru 2021, diagnóstikadu ho sindroma insufisiénsia respiratória aguda (SIRA) tanba  COVID.

Notisia relevante:COVID-19, mate rua no kazu ativu 2.952

Matebian sofre mós moras Asidente Vascular Cerebral (AVC) iskémiku. Matebian hala’o tratamentu iha Vera Cruz, maibé i’is-kotu horiseik loraik 15:20. Familia kolabora ho ekipa saúde, hodi hala’o funerál tuir protokolu ne’ebé adopta iha Timor-Leste.

Daruak, mane ida ho idade 68, hela iha Dili, seidauk simu vasina, iha 14 setembru 2021, diagnóstikadu ho sindroma insufisiénsia respiratória aguda (SIRA) tanbá Covid-19 iha HNGV.

“Iha loron ne’e i’is-kotu, iha lorokra’ik 17:25. Familia kolabora ho ekipa saúde, hodi hala’o funerál tuir protokolu ne’ebé adopta iha Timor-Leste,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, kuarta ne’e.

Kazu rekoperadu ohin nian hamutuk  265, kazu ativu 2.756 no kazu foun 71 maihosi Dili 34,  Baucau 11 no munisípiu seluk hamutuk 26 kompostu hosi mane 40 no feto 31.

Hosi totál kazu detetadu foun ohin, ho idade 20-11 (15,4%) ho idade entre tinan 12-59 na’in 54 (76,0%), idade 60 na’in-neen.

Husi kazu detetadu foun ohin, 54 kazu ka 54,2% sintomatiku (hatudu sintomas). Hosi kazu detetadu foun ohin  56(78,9%) iha ona vasina kompletu no 8  (11%) hetan ona vasina doze dahuluk.

Kumulativu kazu konfirmadu sura hosi 21 marsu 2020 to’o 15 setembru 2021 hamutuk 18.786. Hosi horisehik mai ohin, teste ne’ebé Laboratóriu Nasionál Saúde halo hamutuk 283 PCR, ho detallu hanesan tuir-mai, Vijilánsia sentinela na’in 16, rastreiu ba kontaktu ka Contact tracing lima, Rastreiu Aleatóriu  ka Random Screening nain 41, viájen sai-hosi serka sanitária hosi Dili 105,  Viájen internasionál hitu, Follow up iha kuarentena na’in 109.

Totál testes PCR ne’ebé halo horisehik 14 setembru iha munisípiu-sira seluk, RAEOA no HNGV hamutuk 385, ho detalla hanesan tuir-mai, Maubisse 24, Maliana 19, Viqueque sia, Suai 69, Baucau 40, Ermera 22, RAEOA 77, HNGV 85 no Lospalos 40.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 15 setembru tuir sistema informasaun Saúde iha Ministériu Saúde ho totál kumulativu 1ª doze iha Dili (75,9%) no totál  kumulativu 2ª doze  iha Dili (62,1%).

Ema ne’ebé simu ona vasina doze dahuluk iha Timor Leste  (54,2%) no simu ona doze daruak  (31,1%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-nain epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 8,0/100 mil abitante, enkuantu ba deit munisípiu Dili,18,0/100 mil abitante.

Ohin, munisípiu Bobonaro iha insidénsia 10,9/100 mil abitantes, tuir kedas ho RAEOA  ho insidénsia 7,9/100 mil abitante, hafoin Baucau ho insidénsia 7,5/100 mil abitante.

Dadus iha leten hatudu katak, insidénsia munisípiu Dili ho munisípiu Baucau tuir-tuir malu a’as-liu, iha Timor-Leste laran tomak munisípiu rua seluk –  RAEOA  ho Baucau– mós hatudu risku a’as-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha loron 15 setembru 2021, izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu na’in 74, ho detalle hanesan tuir-mai grave hamutuk na’in  12, na’in-lima  uza ventiladór, na’in-tolu uza CPAP-Continuous Positive Airway Pressure, haat uza oksijéniu. Moderadu hamutuk ema na’in 45. Kaman ema na’in 17.

Ba populasaun iha Timor-Leste laran tomak, maski simu ona vasina, favor respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira ne’e mak hanesan uza mascara fase liman beibeik ho sabaun ka dezinfetante ruma  evita kose liman ba matan, inus ho ibun  bainhira kumprimenta malu, la presiza ka’er liman, bensa-liman, rei-malu ka haku’ak malu evita halibur malu barak  hamri’ik ka tur do’ok husi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here