Pesoál saúde prepara vasina Sinovac atu oferese ba komunidade iha Sentru Saúde Comoro, segunda (13/09). Imajen TATOLI/António Gonçalves

DILI, 14 setembru 2021 (TATOLI)—Sala Situasaun, Sentru Integradu Jestaun Krize (SIJK), rejista kazu mate rua, pozitivu 118, rekoperadu 176 no kazu ativu 2.952.

Totál óbitu ne’ebé relata ohin, primeiru mane ida ho idade 71, hela iha Ermera, simu vasina kompletu, iha 13 Setembru 2021, diagnóstikadu ho sindroma insufisiénsia respiratória aguda (SIRA), tanba COVID-19 iha Sentru Saúde Ermera.

Notisia relevante:COVID-19, mate ida no kazu ativu 3.013

Matebian sofre mós moras ipertensaun. Matebian hala’o tratamentu tuir protokolu tratamentu COVID-19, iha fatin izolamentu Ermera, maibé i’is-kotu horiseik loraik 15:00 no família kolabora ho ekipa saúde, hodi hala’o funerál tuir protokolu ne’ebé adopta iha Timor-Leste.

Segundu, mane ida ho idade 64, hela iha Maliana, seidauk simu vasina, iha 02 setembru 2021, diagnóstikadu ho sindroma insufisiénsia respiratória aguda (SIRA), tanba COVID-19 iha Maliana.

Iha loron ne’e kedan matebian hala’o tratamentu iha Vera Cruz, maibé i’is-kotu ohin dader 03:05.

“Familia kolabora ho ekipa saúde, hodi hala’o funerál tuir protokolu ne’ebé adopta iha Timor-Leste,”  Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, tersa  ne’e.

Kazu foun ohin 118 mai hosi Dili 93, no munisípiu seluk hamutuk 25, ne’ebé kompostu hosi mane 66 no feto 52.

Hosi totál kazu detetadu foun ohin, ho idade 20-15 (9,7%), entre tinan 12-59 na’in 96 (81,3%), idade 60 na’in-hitu, iha 54 kazu ka 54,2% sintomatiku (hatudu sintomas), 31 (26%) iha ona vasina kompletu no 12  (10%) hetan ona vasina doze dahuluk.

Kumulativu kazu konfirmadu sura hosi 21 marsu 2020 to’o 14 setembru 2021 hamutuk 18.715. Hosi horisehik mai ohin, teste ne’ebé Laboratóriu Nasionál Saúde halo hamutuk 404 PCR, ho detallu hanesan tuir-mai, Vijilánsia sentinela na’in 44, rastreiu ba kontaktu ka Contact tracing  58, Rastreiu Aleatóriu  ka Random Screening nain 64, viájen sai-hosi serka sanitária hosi Dili 131, Viájen internasionál 67, Follow up iha kuarentena na’in 40.

Totál testes PCR ne’ebé halo horisehik 13 setembru iha munisípiu-sira seluk, RAEOA no HNGV hamutuk 339, ho detalla hanesan tuir-mai, Maubisse 27, Maliana 10, Viqueque 13, Suai 27, Baucau 46, Ermera 25, RAEOA 41, HNGV 115 no Lospalos 35.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 14 setembru tuir sistema informasaun Saúde iha Ministériu Saúde  ho totál  kumulativu 1ª doze iha Dili (75,7%) no totál  kumulativu 2ª doze  iha Dili (61,7%).

Ema ne’ebé simu ona vasina doze dahuluk iha Timor-Leste (53,9%) no simu ona doze daruak  (30,7%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 8,9/100 mil abitante, enkuantu ba de’it munisípiu Dili, 21,1/100 mil abitante.

Ohin, munisípiu Bobonaro iha insidénsia 10,1/100 mil abitante, tuir kedan ho RAEOA ho insidénsia 9,5/100 mil abitante, hafoin Baucau ho insidénsia 8,2/100 mil abitante.

Dadus iha leten hatudu katak, insidénsia munisípiu Dili ho munisípiu Baucau tuir-tuir malu a’as-liu, iha Timor-Leste laran tomak munisípiu rua seluk –  RAEOA  ho Baucau– mós hatudu risku a’as-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha loron 14 setembru 2021, izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu na’in 75, ho detalle hanesan tuir mai, grave hamutuk na’in  13, na’in-haat  uza ventiladór, na’in-tolu uza CPAP-Continuous Positive Airway Pressure, na’in-neen uza oksijéniu. Moderadu hamutuk ema na’in 43. Kamán ema na’in 19.

Husu  ba populasaun iha Timor-Leste laran tomak, maski simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e mak hanesan, uza máskara fase liman beibeik ho sabaun ka dezinfetante ruma  evita kose liman ba matan, inus ho ibun  bainhira kumprimenta malu, la presiza ka’er liman, bensa-liman, rei-malu ka haku’ak malu evita halibur malu barak  hamri’ik ka tur do’ok husi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here