Deputadu PD, Adriano do Nascimento. Foto TATOLI

DILI, 15 setembru 2021 (TATOLI)–Bankada Partido Democrática (PD) levanta problema tolu iha abertura sesaun lejizlativa dahaat iha lejizlatura dalima nian.

Deklarasaun Bankada Partido Democrático ohin, iha abertura 4ª sesaun lejizlativa hatuur iha kontestu resesu parlamentár iha resesaun ekonómika nasaun nian no Partido Democrático hanoin katak, resesu parlamentár nu’udar meiu ida ba parlamentár sira atu haree no tetu hikas povu no nasaun nia moris iha tinan hirak liubá, ohin no ba aban bainrua.

Vise-Xefe Bankada PD, Adriano do Nascimentu, levanta kestaun importante tolu, hodi formula liuhosi perguntas tolu.

Notísia Relevante: Sesaun Lejizlativa datoluk hatudu produtividade

“Primeira pergunta, problema saída mak povu no nasaun Timor-Leste enfrenta hela, iha sira-nia moris iha tinan hirak liubá, ohin no iha futuru. Resposta ba pergunta ida-ne’e, mak Partido Democrático haklaken nia perspetiva polítika katak povu no nasaun ida enfrenta hela problema fundamental tolu,” Vise-Xefe Bankada PD levanta liuhosi plenária, kuarta ne’e.

Probema dahuluk mak líder no lideransa nasaun, basá líder politiku sira hatuur nia interese pesoál no grupu aas liu interesse povu no nasaun.

Faktu hatudu katak, lider polítiku sira satan malu no hatun malu, tanba interese podér polítiku, hodi ignora diálogu nasionál, rekonsiliasaun nasionál no konsertasaun polítika atu hatuur dezenvolvimentu nasional ne’ebé dignifika povu no nasaun.

Aktu polítiku hirak ne’e mak hamosu inserteza polítika, hamihis konfiansa no esperansa povu no komunidade internasionál, tamba ne’e mak Timor-Leste monu ba resesaun ekonómika, ne’ebé hatudu indikasaun katak ekonomia Timor-Leste iha tinan 2020 monu ba 7%, ne’ebé signifika GDP nasaun nian monu aat liu ba hodi atiji 7.3% no todan atu hamriik ka rekopera iha tempu badak, despeza públiku monu ba 9 % no hamonu mós setór interligadu sira seluk.

Problema daruak mak pandemia COVID-19 no siklone seroja tropical ne’ebé akontese iha 04 abríl 2021, hamosu dezastre umana hodi hamate povu, harahun infra-estrutura públika, paraliza no hamate atividade ekonómika no finanseira no seluk tán.

Fukun datoluk mak inserteza polítika atu define no dezenvolve reseta alternativa, liu-liu inserteza polítika atu dezenvolve gás iha kampu Greater Sunrise hodi substitui reseita no produsaun gás hosi kampu Bayu Undan, ne’ebé menus ba beibeik hosi fulan ida ba fulan seluk. Inserteza polítika atu dezenvolve setór privadu no kooperativa, nu’udar pilár ba dezenvolvimentu ekonomia nasaun nian, hodi tane no hametin setór públiku iha nasaun ne’e.

Tuir perspetiva bankada Partido Democrático katak, Timor-Leste enfreta hela problema tolu iha prosesu governasaun nasaun mak hanesan polítiza mákina Estadu ba interesse pesoál no grupu tanba impaktu hosi polítiku satán malu no hatun-malu, hodi hamosu aktu intoleránsia no konfrontasaun polítika iha servisu jestaun no administrasaun Estadu nian.

Nune’e mós inserteza polítika ne’ebé enfrakeza líder no lideransa nasaun nian mak fó biban ba pesoál no grupu balun, hodi intensifika prátika korrupsaun, kolusaun no nepotizmu (KKN), hodi desvia rekursu finanseiru no patrimoniál ba interesse pesoál no grupu.

Bankada PD haree katak konfiansa no esperansa públika ba Governu no governasauan nasaun nian sai mihis liután durante tinan haat nia laran, tanba aktu intoleránsia no konfrontasaun polítika entre líder polítiku sira, no lideransa nasaun nian hadok-aan hosi povu nia preokupasaun no nesesidade bázika atu hamoris sira-nia an iha nasaun ukun rasik-aan ida.

PD fó solusaun

Atu solusiona problema hirak ne’e, Bankada Partido Democrático haklaken nia perspetiva polítika hanesan lider polítiku sira tenke halo diálogu nasionál, rekonsiliasaun nasional no konsertasaun polítika ba kestaun interesse nasional hanesan.

Iha asuntu ida-ne’e, PD husu halo ona revizaun ba Konstituisaun RDTL, liu-liu artigu hirak-ne’ebé sai fonte ba polémika polítika entre líder polítiku sira, konsertasaun polítika hodi hatuur fonte reseita alternativa, liu-liu polítika ba dezenvolvimentu greater sunrise no pipeline, esplorasaun no dezenvolvimentu petróleu no minerál, polítika ba dezenvolvimentu setór privadu no kooperativa.

Bankada PD husu revee ona planu Estratéjiku Dezenvolvimentu no hatuur guia implementasaun ba planu ne’e, hodi fasilita ukun na’in sira atu hatuur iha programa polítika ba governasaun.

Bankada Partido Democrático, husu ba líder polítiku sira iha nasaun ne’e, atu unifika pensaun no asaun, hodi harii Timor foun ida,ba Timor oan hotu-hotu, mai hosi hun ida, abut ida, iha Timor-Leste ida de’it.

Ba objetivu ida ne’e, Bankada Partido Democrático husu ba VIII Governu nu’udar jestór ba governasaun da nasaun atu responde nesesidade bázika povu nian hanesaan, halo lalais ona uma ba refujiadu sira-ne’ebé sei hela iha lona okos tanba impaktu siklone seroja, implementa ona polítika rekuperasaun ekonómika hodi ajuda povu sira-ne’ebé deve hela instituisaun finanseira hodi fila liman hanesan fa’an obralan, modo no seluk tán.

Bankada PD husu Governu atu selu ona osan ba frontline sira ne’ebé to’o agora balun seidauk simu sira-nia direitu, no Governu atu halo lalais vasina ba povu iha Timor laran tomak tanba transmisaun COVID-19 deskontroladu ona iha nasaun ida-ne’e.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here