Vise-Prezidente Parlamentu Nasionál, Maria Agelina Sarmento Lopes, halo abertura ba sesaun IV lejislativa hosi V lejislatura Parlamentu Nasionál iha salaun Plenaria Parlamentu, kuarta (15/09). Imajen Tatoli/Francisco Sony.

DILI, 15 setembru 2021 (TATOLI)–Bankada Congresso Nacional de Reconstrução de Timorense (CNRT) preokupa ministériu hotu-hotu oras ne’e konsentra de’it COVID-19.

Notísia Relevante: Ezekusaun fundu COVID-19 atinje ona porsentu 55,6, korresponde millaun $122

“Bankada CNRT konsidera katak iha tinan-rua ikus ne’e, kuaze ministériu hotu-hotu Governu nian konsentra de’it ba servisu saúde hodi haree ba COVID-19, no haluha tiha setór sira seluk,” Reprezentante Bankada CNRT, Deputada Virgínia Anabelo, levanta iha abertura sesaun lejizlativa dahaat hosi lejizlatura dalima, iha uma fukun, kuarta ne’e.

Deputada Bankada CNRT ne’e hateten, Parlamentu Nasionál aprova fundu COVID-19 besik millaun $287,6 maibé Governu la konsege trava propagasaun COVID-19 nian.

“Governu uza razaun movimentu livre ho kartaun kinur atu enkoraja sidadaun sira simu vasina, maibé mezmu hanesan ne’e, bainhira aplika konfinamentu obrigatóriu Governu limita hotu movimentu povu nian inklui sira-ne’ebé simu ona vasina dala-rua.

Bankada CNRT lamenta desizaun Governu nian ne’ebé kontinua husik aviaun tama sai nafatin Timor-Leste hodi permite ukun na’in ho nia família sira halo viajen ba rai-li’ur.

Bankada CNRT konsidera katak regra sira hosi Organizasaun Mundial Saúde ne’ebé subliña katak sidadaun hotu-hotu ne’ebé tama ka sai hosi nasaun ida ba nasaun seluk, mezmu simu ona vasina dala-rua tenke halo auto-kuarentena tanba períodu inkubasaun virus COVID-19 no nia variante sira mak loron 14, liu-liu variante Delta ne’ebé da’et lais liu no perigu liu iha momentu ida-ne’e.

“Iha Timor-Leste, governante no ukun-na’in sira ho nia família la halo auto-kuarentena. Se nune’e regra sira-ne’e sei serve atu aplika iha Timor-Leste ka lae. Se nune’e, iha lójika ka lae bainhira ita sulan no limita povu atu labele halo movimentu hosi munisípiu ida ba munisípiu seluk, enkuantu ita permite ema bele tama-sai iha Timor-Leste? Será ké COVID-19 ne’e tranzmite iha Timor-Leste laran de’it no livre iha nasaun seluk,” Bankada CNRT preokupa.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here