Ministra Saúde (MS), Odete Maria Freitas Belo, akompaña Ministru Defeza, Filomeno da Paixão de Jesus, lansa kampaña vasinasaun kontra COVID-19, iha suku Ilat-laun, postu administrative Bobonaro, Munisípiu Bobonaro, tersa (14/09). Imajen facebook.

BOBONARO, 14 setembru 2021 (TATOLI)—Ministra Saude (MS), Odete Maria Freitas Belo, konsiensializa populasaun Marobo, postu administrative Bobonaro, munisípiu Bobonaro, atu kumpre protokolu saúde, hodi prevene an hosi COVID-19.

“Ami nia-prezensa lori informasaun atu prevene moras ne’e. Bee ruma iha karik fase liman antes atu han, tuur karik tenke dook malu no uza máskara nune’e ita prevene an hosi moras ne’e,” Odete hato’o asuntu ne’e bainhira akompaña Ministru Defeza (MD), Filomeno da Paixão de Jesus, lansa  kampaña vasinasaun kontra COVID-19, iha suku Ilat-laun, postu adminístrativu Bobonaro, munisípiu Bobonaro, tersa ne’e.

Notísia relevante:COVID-19, mate rua no kazu ativu 2.952

Nia mós fó hanoin katak, pandemia COVID-19 eziste iha Timor-Leste  (TL), tinan ida ona no kontinua hamate populasaun, ema barak mak infetadu, nune’e dalan úniku atu mitiga no elimina inimigu invizível ne’e, populasaun tenke simu vasina.

“Ami la’ós obriga imi tenke simu vasina, maibé atu fahe informasaun ba moras aat ida ne’ebé la’o hale’u mundu, la’ós iha Marobo no Maliana de’it,” nia esplika.

Desde implementasaun programa vasina, líder nasionál-sira hanesan, Kay Rala Xanana Gusmão, José Ramos Horta, Fransisco Guteres Lú-Olo, Taur Matan-Ruak, Lere Anan Timur, no membru Governu sira simu ona vasina, nune’e nia dehan, Governu laiha intensaun atu estraga ema nia vida, maibé atu salva populasaun hosi peste COVID-19.

Tuir dadus hosi MS, iha 13 setembru, populasaun munisípiu Bobonaro, hosi idade 18 ba leten to’o idade 69 ho komorblidade hamutuk 41,2% mak simu ona vasina AstraZeneca, hosi númeru ne’e 11,7% mak kompleta ona doze daruak.

Evolusaun surtu COVID-19 iha munisípiu Bobonaro, iha 13 setembru rejista kazu pozitivu durante oras 24 hamutuk sia, rekoperadu lima, ativu 234, kumulativu rekoperadu 385, kumulativu óbitu ualu.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here