Ministra Saúde (MS), Odete Maria Freitas Belo, lansa fatuk dahuluk ba konstrusaun edifísiu pediatria no sirurjia homen, iha Hospitál Referál Maliana, tersa (14/09/21). Imagen Tatoli/Sérgio da Cruz.

BOBONARO, 14 setembru 2021 (TATOLI)—Governu hahú halo konstrusaun ba edifísiu pedatria no sirurjia homen iha Hospitál Referénsia Maliana (HRM), munisípiu Bobonaro, tersa ne’e.

Ministra Saúde (MS), Odete Maria Freitas Belo ne’ebé ofisialmente lansa fatuk dahuluk, husu empreza rua ne’ebé sai ezekutadór atu hatudu serbisu ho responsabilidade, nune’e bele garante kualidade.

Notísia relevante:Pesoál saúde públika 23 destakadu iha postu saúde-sira Bobonaro

“Ami ta’u konfiansa ba kompañia manan na’in-sira atu hatudu obra ho kualidade, nune’e bele ajuda fó fatin di’ak pasiente-sira hodi halo tratamentu iha ospitál Maliana,” Odete Maria Freitas Belo, hateten.

Tuir planu MS katak, konstrusaun ne’e atu kompleta rekezitu mínimu Beat Ocupatio Rate (BOR), signifika, Hospital Rejionál-sira iha Timor laran tomak, tenke kompleta kama 100, liga mós ho planu prioridade MS nian, harii infraestrutura saúde, hodi bele dezenbolve no hadi’a antendimentu saúde públika ba komunidade, liu-liu iha situasaun pandemia globál Covid-19.

Ministra saúde mós enkoraja empreza rua ne’e atu aselera projetu tuir tempu determinadu, tanba situasaun Covid-19 no besik tama ona ba tempu udan.

Husu mós ba autoridade munisipál Bobonaro, liu-liu Diretór ezekutivu HRM, atu halo supervizaun ba obra ne’e, nune’e bele hatudu rezultadu pozitivu hodi benefisia komunidade.

Konstrusaun sala pediatria ne’e sei kompleta uma ho medida naruk metru 35,02 no lu’an metru 17,20 konstrui ho totál kama 24, iha mós haris fatin, instalasaun eletrisidade inklui bee moos.

Projetu ne’e responsabiliza hosi empreza Fraternite Unipesoal Lda, ho totál kustu hamutuk $303.252,65 ho durasaun kontratu fulan neen, ne’ebé sei finaliza iha fulan fevereiru tinan oin.

Kona-bá kontrusaun edifísiu sirurjia homen, iha uma ho medida naruk metru 35,02 no lu’an 17,20 kompleta ho kama 24, haris fatin, instalasaun eletrisidade inklui bee moos.

Projetu ne’e responsabliza hosi empreza Hugo Amor unipesoál Lda ho totál kustu $268.623,47 ho nia durasaun kontratu fulan neen, sei termina iha fulan fevereiru 2022.

Iha tinan fiskál 2021, Governu liuhosi Ministériu Saúde dezenvolve no konstrui ona infraestrutura saúde iha munisípiu Bobonaro mak hanesan, kuarentena Batugade ho valór $158.501,75, Izolamentu Covid-19 iha HRM maliana ho valór $236.772,06.

Alende ne’e, reabilitasaun ba izolamentu Covid-19 iha Polo UNTL Maliana ho valór rihun $180, Laboratóriu Covid-19, Sala ICU Covid-19 ho Valor $17.288,91, inklui armazén SAMES Bobonaro ne’ebé konstrui desde 2019 ho valór $202,190,97.

Infraestrutra hirak-ne’e konstrui iha ámbitu pandemia Covid-19, afeta Timor-Leste, daudaun ne’e balun finaliza ona no balun sei iha faze konstrusaun.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here