Pesoál saúde públika 23 ne'ebé preparadu atu destaka ba postu saúde 25 iha munisípiu Bobonaro, tersa (08/09). Imajen Tatoli/Sérgio da Cruz.

BOBONARO, 08 setembru 2021 (TATOLI)—Ministériu Saúde (MS) deside hodi destaka pesoál saúde públika kontratadu hosi rejime internatu hamutuk na’in 23, hodi apoia serbisu saude, iha munisipiu Bobonaro.

“Ita simu tán kategoria saúde públika na’in 23, kolokadu ba postu saude-sira iha munisípiu Bobonaro hodi apoia programa saúde na família,” Diretór Serbisu Saúde munisípiu Bobonaro, João Barreto Cardoso, hateten iha kna’ar fatin, Soso Maliana, kuarta ne’e.

Notísia relevante:MS inaugura kuarentena-ICU iha Bobonaro

Antes ne’e MS destaka ona médiku, infermeiru no parteira, hodi prienxe postu saúde operasionál 25 iha postu administrativu neen, iha Bobonaro.

Durante ne’e pesoál saúde limitadu, nune’e MS rekruta pesoál saúde hirak-ne’e, atu responde ba preokupasaun hirak ne’e, hodi reforsa tan atividade ligadu ho saúde públika no mós programa COVID-19.

Pesoál saúde hirak-ne’e ninia kontratu to’o 31 dezembru tinan 2021, maibé posiblidade estende, bainhira iha nesesidade iha tempu tuir-mai.

Iha biban ne’e pesoál saúde públika, Adriano Paulo Marçal, promete sei hatudu serbisu ho profisionál no responsablidade.

Pesoál saúde sira-ne’e sei destaka ba  kada postu saúde, iha postu administrativu, Atabae, Balibo, Cailaco, Maliana, Loloto’e no Bobonaro.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here