Komunidade simu vasina Sinovac husi pesoál saúde iha Sentru Saúde Comoro, segunda (13/09/21). Imajen Tatoli/António Gonçalves.

DILI, 13 setembru 2021 (TATOLI)—Sala Situasaun, Sentru Integradu Jestaun Krize (SIJK), rejista kazu mate na’in-ida, pozitivu 82, rekoperadu 174 no kazu ativu 3.013.

Kazu mate ne’e mane ida idade 65, hela iha Dili, seidauk simu vasina, ohin dader madrugada, diagnóstikadu COVID-19 ho AVC emorájiku iha HNGV.

Notisia relevante:COVID-19: óbitu rua, detetadu 74 no rekuperadu 222

“Matebian iis-kotu madrugada, 01:19, iha HNGV. Familia deside lori mate-isin ba uma,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, segunda  ne’e.

Kazu foun ohin 82 mai hosi Dili 44, Baucau 10, Manufahi hitu, RAEOA lima, no munisípiu seluk hamutuk 16, kompostu hosi mane 35 no feto 47.

Hosi totál kazu detetadu foun ohin, ho idade 20-8 (9,7%)  entre tinan 12-59 na’in 68 (83,6%), idade 60 na’in-neen, na’in 22 kazu  ka 27,5% sintomatiku (hatudu sintomas), iha na’in  47 (57,3%) iha ona vasina kompletu no sia  (11%) hetan ona vasina doze dahuluk.

Kumulativu kazu konfirmadu sura hosi 21 marsu 2020 to’o 13 setembru 2021 hamutuk 18.597. Hosi horisehik mai ohin, teste ne’ebé Laboratóriu Nasionál Saúde halo hamutuk 216 PCR, ho detallu hanesan tuir-mai, Vijilánsia sentinela na’in 19, rastreiu ba kontaktu ka Contact tracing 24, Rastreiu Aleatóriu  ka Random Screening nain 31, viájen sai-hosi serka sanitária hosi Dili 37,  Viájen internasionál 58, Follow up iha kuarentena na’in 47.

Totál testes PCR ne’ebé halo horisehik 12 setembru iha munisípiu-sira seluk, RAEOA no HNGV hamutuk 249, ho detalla hanesan tuir-mai, Maubisse18, Maliana 21, Viqueque sia, Suai 20, Baucau 87, Ermera lima, RAEOA sia, HNGV 70 no Lospalos 10.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 13 setembru tuir sistema informasaun Saúde iha Ministériu Saúde  ho totál  kumulativu 1ª doze iha Dili (75,4%) no  totál  kumulativu 2ª doze  iha Dili (61,2%).

Ema ne’ebé simu ona vasina doze dahuluk iha Timor-Leste  (53,6%) no simu ona doze daruak  (30,2%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 9,7/100 mil abitante, enkuantu ba de’it munisípiu Dili,22,2/100 mil abitante.

Ohin, munisípiu Baucau iha insidénsia 10,5/100 mil abitante, tuir kedan ho munisípiu Bobonaro   ho insidénsia 10,3/100 mil abitante, hafoin RAEOA  ho insidénsia 10,1/100 mil abitante.

Dadus iha leten hatudu katak, insidénsia munisípiu Dili ho munisípiu Baucau tuir-tuir malu a’as-liu, iha Timor-Leste laran tomak, munisípiu rua seluk – Boboanro ho RAEOA mós hatudu risku a’as-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha loron  13 setembru  2021, izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu na’in 81, ho detalle hanesan tuir-mai grave hamutuk na’in  12, na’in-tolu  uza ventiladór, na’in-haat uza CPAP-Continuous Positive Airway Pressure, lima uza oksijéniu. Moderadu hamutuk ema na’in 45. Kaman ema na’in 24.

Husu ba populasaun iha Timor-Leste laran tomak, maski simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e, mak hanesan uza mascara, fase liman beibeik ho sabaun ka dezinfetante ruma, evita kose liman ba matan, inus ho ibun  bainhira kumprimenta-malu, la presiza ka’er-liman, bensa-liman, rei-malu ka haku’ak-malu, evita halibur-malu barak, hamri’ik ka tur do’ok hosi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here