Formasaun iha suku Liurai, postu Aileu Vill, munisípiu Aileu, segunda (13/09/2021). Imajen TATOLI/Antónia Gusmão

AILEU, 13 setembru 2021 (TATOLI)–Sekretaria Estadu Kooperativa (SEKoop) fó formasaun ba grupu Juventude Unidade Kria Dezenvolvimentu Área Rurál (JUDEAR) durante loron-haat, ne’ebé daudaun ne’e haknaar-an iha Movimentu Kamponeza Timor-Leste (MOKATIL).

Formasaun ne’e hala’o iha sede MOKATIL iha suku Liurai, postu administrativu Aileu, munisípiu Aileu, no formadór mai hosi funsionáriu SEKoop.

Iha abertura, Sekretáriu Estadu Kooperativa, Elizário Ferreira, husu ba partisipante sira atu foku hodi apreende, nune’e bele dezenvolve di’ak liután grupu no ajuda ekonomia família.

“Formasaun sei foku ba área produsaun, jestaun produsaun no jestaun merkadoria, katak oinsá membru sira bele lori sirania produtu to’o merkadu, no oinsá bele kuda no asegura sustentabilidade produsaun,” Sekretáriu Estadu Elizário Ferreira, hateten, hafoin halo abertura formasaun iha suku Liurai, segunda ne’e.

Governante ne’e kompromete, programa ne’e sei realiza nafatinno bebeik, ne’ebé SEKoop mós sei akompaña grupu tanba iha motivadór no organizadór iha Aileu na’in-rua, Remexiu na’in-rua, Lekedoe na’in-rua no Laulara na’in-rua.

Nune’e mós, sei planeia destaka na’in-rua iha suku Liurai, atu nune’e bele ajuda jere jestaun atividade grupu, tanba grupu iha ona kreatividade, enkuantu kooperativa ne’e iha rasik ona kapitál hanesan to’os, natar, no animál haki’ak.

Notísia relevante: SEKoop komprometidu harii loja kooperativa iha Ainaro

SEKoop ninia dever maka organiza merkadu ba produtu sira no enkoraja grupu kooperativa sira atu kontinua prodús tanba iha programa Loja Kooperativa, ho objetivu atu akomoda produtu.

Grupu kooperativa tenke iha inisiativa no espíritu inovadora

Iha fatin hanesan, Adjuntu Administradór Aileu, Feliz Maria de Oliveira, hateten, dezenvolvimentu iha kontestu lokál, nível komunidade katak na’in mak pesoál ne’ebé haknaar-an no fó fiar ba malu atu grupu ne’e la’o.

Nia konsidera grupu kooperativa tenke iha inisiativa, espíritu inovadora, no kreatividade atu labele lakon le’et de’it iha dalan klaran no grupu ne’e fó nafatin iis, tanba estrutura grupu ida ne’e maka konsidera hanesan ruin.

“Grupu ne’e di’ak tebes tanba iha fasilidade kompletu, maibé falta de’it maka koñesimentu, tanba ne’e Governu liuhosi Sekretaria Estadu Kooperativa kontinua fó nafatin apoiu no kbiit atu grupu ne’e bele moris. Entaun hanesan Aileu-oan buka nafatin kolabora, koopera ho autoridade sira atu sasán hirak ne’e labele sai hanesan esprimenta polítika de’it, maibé tenke sai hanesan realidade ida atu transformasaun ne’e akontese,” nia dehan.

Tuir Feliz Maria, formasaun ne’e importante tebes, tanba bele muda ema-nia hanoin atubele enkuadra di’ak liután utiliza fasilidade ein termu tékniku no administrativu.

“Tenke aprende atu fó solusaun ba nesesidade grupu, maibé tenke foku hodi apreende netik buat ruma, maski iha formadór ho kapasidade boot, maibé tenke esforsu, enkuantu partisipante sira lakohi esforsuan hodi apreende ne’e sei saguate de’it,” nia enkoraja.

Nune’e mós, Responsável Grupu no prezidente MOKATIL Aileu, Marcelino Mendonça, hateten, grupu JUDEAR nu’udar kooperativa ne’ebé foin estabelese tinan-rua no daudaun ne’e akumula ona osan hamutuk $1.500.

“Grupu fó ‘simpan pinjam’ katak membru sira tau rasik sirania osan no sira mak bele empresta, maibé to’o agora seidauk bele fó kréditu tanba grupu ne’e foin mak membru 36,” nia informa.

Formasaun ne’e mai hosi membru sira iha postu administrativu haat iha munisípiu Aileu, ne’ebé hosi grupu kooperativa JUDEAR ne’ebé haknaar-an iha MOKATIL.

Jornalista : Antónia Gusmão

Editora       : Julia Chatarina

HAKEREK NO HATÁN

Please enter your comment!
Please enter your name here