Sekretáriu Estadu Kooperativa, Elizário Ferreira. Imajen TATOLI/Egas Cristóvão

AINARO, 08 jullu 2021 (TATOLI)—Sekretáriu Estadu Kooperativa (SEKoop), Elizário Ferreira, komprometidu harii loja Kooperativa iha munisípiu Ainaro hodi insentiva produsaun no grupu kooperativa produsaun multi-setorál bele fa’an produtu iha fatin ne’e.

“Bainhira iha ona loja, produtu sei mai hosi komunidade. Tanba ne’e, tenke prodús produtu sira halo barak hodi tau iha loja ne’ebé harii ona, ortikultura sira tenke prodús ho kuantidade barak inklui agro-agrikultura, peska no turizmu komunitáriu sira,” Sekretáriu Estadu hateten durante loke formasaun ba dirijente no membru kooperativa iha salaun Ministériu Agrkultura Peska (MAP) munisípiu Ainaro, kinta ohin.

Nune’e, governante ne’e husu ba membru kooperativa sira iha rejiaun ne’e, bainhira atu harii loja ba kooperativa, tenke la’o ho kooperativa produsaun multi-setorál ne’ebé nia sentru sei instala iha Ainaro.

“Produtu kafé ne’ebé atu lori ba nasionál, tenke tau ona hamutuk iha sentru ou loja ne’ebé iha ona. Sede kooperativa tenke hamutuk ho loja kooperativa, maibé mós tenke iha armazen ida hodi rai produtu,” nia akresenta.

Aleinde ne’e, nia promete sei esforsu hodi legaliza grupu kooperativa produsaun multi-setorál hodi bele hala’o atividade ho di’ak.

Notísia relevante: Grupu kooperativa produsaun Ainaro seidauk hetan baze legál hala’o atividade

“SEKoop sei fó apoiu no fasilita membru sira hodi legaliza sira-nia atividade produsaun, tanba iha departmentu ida mak ko’alia kona-ba rejistu no sertifikasaun ne’ebé sei kondúz no verifika kooperativa ida hodi rejista iha notariadu, nune’e bele iha ona lisensiamentu,” nia subliña.

Jornalista : Natalino Costa

Editora    : Julia Chatarina

HAKEREK NO HATÁN

Please enter your comment!
Please enter your name here