Logotipu BCTL. Imajen/Espesiál

DILI, 13 setembru 2021 (TATOLI)—Iha ámbitu aniversáriu Banku Sentrál Timor-Leste (BCTL, sigla portugés) ba 10 iha loron 13 setembru, banku atribui prémiu (Central Bank Awards) ba kategoria rua hanesan Outstanding no Excellent.

Tuir nota ne’ebé Agência TATOLI asesu iha segunda ne’e, kategória prémiu rua-ne ́e sei atribui ba ema ka entidade ne ́ebé serve duni atu hetan tanba rekoñesimentu ba ninia kontribuisaun ba dezenvolvimentu iha setór finanseiru ne ́ebé benefisia populasaun ein jerál iha Timor-Leste.

“Nune ́e, BCTL deside entidade Rádiu Komunidade Maubisse-Mauloko, mak merese ba prémiu ho kategoria Excellent, tanba Rádiu Komunidade ne’e hanesan parseiru valiozu ne ́ebé apoiu programa nasionál Banku Sentrál hodi promove Kampu Dijitál iha postu administrativu Maubisse durante tinan 2020,” subliña nota hosi BCTL.

Notísia relevante: BCTL ofisializa programa kampu dijitál iha Maubisse

Banku Sentrál konsidera, vensedór prémiu durante ne’e halo esforsu espesiál no fó kontribuisaun exelente ba publikasaun notísia simples, kualitativu no informativu, ne ́ebé refleta ba fonte informasaun adekuadu no insentiva públiku atu utiliza servisu finanseiru.

“Ida-ne’e hanesan kontribuisaun importante ba dezenvolvimentu setór finanseiru iha Timor-Leste, partikularmente iha área rurál sira,” refere nota.

Kada tinan, BCTL komemora nia aniversáriu ho seremónia ne ́ebé inklui anúnsiu prémiu prestíjiu hosi Banku Sentrál, maibé tinan ne’e tanba situasaun pandemia ne’ebé afeta mundu tomak inklui Timor-Leste, maka parte banku deside la komemora.

Maski nune’e, BCTL deseja kontinua mantein kustume atu konsede prémiu Banku Sentrál iha nia loron aniversáriu.

Nune’e, tanba kondisaun COVID-19, prémiu ne ́e sei entrega diretamente ba Rádiu Komunidade Maubisse-Mauloko iha tempu tuir mai.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here