Dadus evolusaun surtu COVID-19 iha Timor-Leste, hahú hosi loron 21 marsu 2020 to’o 11 setembru 2021. Imajen/CIGC

DILI, 11 setembru 2021 (TATOLI)–Sala Situasaun, Sentru Integradu Jestaun Krize (CIGC, sigla portugés) relata dadus atuál COVID-19 ba ohin loron, ne’ebé rejista kazu óbitu rua, detetadu foun 74, rekuperadu 222 no kazu ativu 3.145.

Kazu óbitu ida, mane ho idade tinan 57, estranjeiru no hela iha Dili, vasina seidauk kompletu, ne’ebé iha loron 09 setembru, diagnóstikadu ho sindroma insufisiénsia respiratória aguda (SIRA) tanba COVID-19, nune’e iha loron ne’e kedas halo tratamentu iha Lahane no hakotu iis ohin dadeer, no família kolabora ho ekipa saúde atu hala’o funerál tuir protokolu saúde.

Enkuantu óbitu seluk, feto ne’ebé ho inan-aman hela iha Lospalos, hala’o tratamentu ba infesaun vias urinária ho sindroma sepse iha HoREX Baucau, ne’ebé iha loron 10 setembru, diagnóstikadu ho sindroma insufisiénsia respiratória aguda (SIRA) tanba COVID-19 no hakotu iis horikalan, familia kolabora ho ekipa saúde, atu hala’o funerál.

Nune’e, Kumulativu kazu konfirmadu sura hosi loron 21 marsu 2020 to’o 11 setembru hamutuk 18.382.

Hosi horiseik to’o ohin, teste PCR iha Dili ne’ebé mak Laboratóriu Nasionál Saúde halo hamutuk 300 PCR iha Dili, kompostu hosi vijilánsia sentinela 74, rastreiu ba kontaktu 53, rastreiu aleatóriu 45, viajen sai hosi serka sanitária Dili 79, viajen internasionál 5, no follow-up iha kuarentena 44.

Totál testes PCR ne’ebé halo iha loron 10 setembru iha munisípiu seluk, Rejiaun Administrativa Espesiál Oé-cusse Ambeno (REAOA) no Hospital Nacional Guido Valadares (HNGV) hamutuk 386, kimpostu hosi Baucau 67, Ermera 16, Maliana 31, Maubisse 16, RAEOA 47, Suai 19, Viqueque 10, Lospalos 41 no HNGV 139.

Informasaun kona-ba ospitalizasaun, iha loron 11 setembru 2021, izolamentu Vera Cruz, Lahane, HNGV no fatin seluk iha territóriu laran tomak, halo tratamentu ospitalizadu ba kazu detetadu pozitivu nain 93, kompostu hosi grave ema na’in-12 (na’in-lima uza ventiladór, na’in-haat uza CPAP-Continuous Positive Airway Pressure, no na’in-tolu uza oksijéniu), moderadu hamutuk ema na’in-51, no kma’an hamutuk ema na’in-30.

Liuhosi biban ne’e, CIGC husu ba populasaun iha Timor-Leste laran tomak, maski simu ona vasina, maibé tenke respeita nafatin regra prevensaun no ijiéne individuál, ne’ebé Governu hatuur ona atu prevene moras COVID-19 da’et ba mai.

Regraprevensaun sira mak hanesan uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun bainhira kumprimenta-malu, la presiza kaer-liman, bensa-liman rei-malu ka hakuak-malu, evita halibur-malu barak hamriik ka tuur dook hosi ema seluk, mínimu metru ida ho balun.

Jornalista : Osória Marques

Editora      : Julia Chatarina

HAKEREK NO HATÁN

Please enter your comment!
Please enter your name here