Prezidente Autoridade Nasionál Petróleu no Minerál, Florentino Soares Ferreira. Imajen TATOLI/Francisco Sony

DILI, 13 setembru 2021 (TATOLI)–Autoridade Nasionál Petróleu no Minerál (ANPM) no empreza petrolífera australiana, Santos, asina nota entendimentu hodi bele kaptura no armazena (rai) karbonu (CCS-Carbon Capture and Storage) iha kampu Bayu-undan bainhira produsaun hotu.

Seremónia asinatura ne’e realiza via virtuál entre Prezidente ANPM, Florentino  Soares Ferreira no Diretór Ezekutivu Santos Kevin Gallagher.

Biban ne’e, Prezidente ANPM, hateten, inisitiva ne’e atu dezenvolve iha futuru, bainhira kampu Bayu-undan maran.

“Entendimentu ne’e atu foka liu oinsá hatuur enkuadamentu hodi halo diskusaun ho Santos, nune’e prepara Bayu-undan sai hanesan saida maka ita bolu  Carbon Capture and Storage, ne’ebé hatudu ba ita oinsá halo sustentabilidade ba indústria petrolífera Timor-Leste,” Prezidente ANPM hateten iha edifísiu Aitarak-laran, segunda ne’e.

Nune’e mós, kompañia Santos hanesan operadór ba Bayu-undan sei haree hamutuk ho ANPM kona-ba kualidade rezervatóriu kampu petrolífera hodi rai dióxidu karbonu (CO2) no explora enkuadramentu tékniku no komersiál ba projetu CCS ne’e rasik.

Prezidente ANPM dehan, kuandu produsaun kampu petrolífera hotu, maka Timor-Leste bele dezenvolve oportunidade seluk ba redusaun CO2.

“Daudaun ita haree katak, ita prodús de’it hosi kampu ida (Bayu-undan), tanba ne’e iha futuru bainhira produsaun iha kampu hotu, ita atu dezmantela ka taka de’it ne’e lae, maibé atu haree oportunidade seluk atu hatama reseita ba Estadu liuhosi dióxidu karbonu,” nia akresenta.

Notísia relevante: Produsaun posu dahuluk iha kampu Bayu-undan hatudu aumentu gás

Iha mundu internasionál, daudaun empreza barak maka muda sira-nia an hosi empreza mina no gas, tanba ezijénsia akordu Paris, ne’ebé mensiona kona-ba país tomak iha mundu tenke adota medida no meta abisioza atu kombate mudansa klimátika.

“Iha akordu Paris ne’e rasik, husu empreza sira kontribui ba redusaun emisaun dióxidu karbonu iha atmosfera. Entaun Timor-Leste la lakon informasaun ida-ne’e no aproveita kedas  hodi fó investimentu maka’as ba petrolífera, nune’e bele kria kampu traballu no fó reseita adisionál ba ita,” nia subliña.

Florentino Soares konsidera inisiativa ne’e nu’udar pasu importante ba Timor-Leste, tanba liuhosi entendimentu ne’e, Santos ne’ebé reprezenta ninia konsórsiu iha Bayu-Undan ho ANPM, hatudu katak Timor-Leste pro-ativu tebes hodi lidera no integra iha setór mina no gas liuhosi komprimisu hodi aselera dekarbonizasaun.

“Maski Timor-Leste hanesan país kiik no emisaun kiik tebes iha mundu, maibé akordu Paris fó insentivu ka konsesaun ba país ne’ebé dezenvolve hela no menus dezenvolvidu sira hanesan Timor-Leste. Ami hatene katak negósiu karbaun no kréditu karbaun nia merkadu mak hanesan parte integradu ida hosi ekonomia iha futuru,” nia hatutan.

Iha parte seluk, ho parseria ne’e fó oportunidade ba timor-oan atu hetan kapasitasaun no koñesimentu kona-ba kaptura no armazena karbonu.

CCS hanesan teknolojia atu kaptura no armazena karbonu iha rai-laran, ne’ebé konsidera hanesan esforsu ne’ebé halo atu halo redusaun emisaun CO2 iha atmosferu no hosi kampu gas balun ne’ebé iha kontíudu CO2 barak tebes.

Inisiativa ne’e nu’udar esforsu ne’ebé ANPM halo atu kontinua fó sustentabilidase ba reseita hosi indústria petrolífera no integra Timor-Leste iha redusaun CO2 iha mundu, maski hanesan país kiik maibé hatudu ba mundu katak Timor-Leste bele lidera iha prosesu sira-ne’e.

Seremónia ne’e, partisipa mós hosi Ministru Petróleu no Minerál, Víctor da Conceição Soares, Embaixadór Austrália iha Timor-Leste, Peter Roberts, inklui ezekutivu senior ANPM.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here