Atividade iha kampu Bayu-undan. Imajen/ANPM

DILI, 23 agostu 2021 (TATOLI)—Empreza petrolífera australiana, Santos Limited hahú ona perfurasaun faze dahuluk mina-matan iha kampu Bayu-undan no identifika katak iha aumentu gás.

“Ita haree posu dahuluk ne’ebé susesu, hosi perfurasaun Bayu-undan, fó aumentu produsaun. Aumentu ne’e refleta iha gás hamutuk 175  standard cubic feet per day (MMsc/d) no líkidu hamutuk 10.000,”  Prezidente Konsellu Diretivu Autoridade Nasionál Petróleu no Minerál (ANPM), Florentino Soares Ferreira, hateten, ba Agência TATOLI, iha ninia knaar fatin, Ministériu Finansa, Aitarak-laran, segunda ne’e.

Notísia relevante: ANPM akompaña Santos fura posu dahuluk iha kampu Bayu-undan

Nune’e, Prezidente ANPM esplika, produsaun iha kampu Bayu-undan hamutuk 600 MMscf/d no totál líkidu hamutuk 26 Mbbl/d.

“Ho aumentu ida-ne’e, signifika ita sei hetan reseita adisionál hosi kampu Bayu-undan. Maibé reseita sira-ne’e sei haree ba presu mina, hafoin ita halo kálkulu hafoin selu taxa. Nune’e, agora ha’u prefere ita lalika temi lai montante osan tanba fa’an tiha mak ita foin bele hatene,” nia akresenta.

Kona-ba perfurasaun posu daruak, nia dehan, sei iha prosesu perfurasaun nia laran no seidauk to’o profunidade alvu, maibé  prosesu perfurasaun la’o normál no di’ak tebes, inklui laiha dezafiu boot mak ekipa hasoru.

“Ita hein iha semana balun mai oin, sei hetan rezultadu ba posu daruak, bainhira atinje ona profunidade alvu,” nia hatutan.

ANPM kontinua halo monitorizasaun ba empreza Santos hodi haree progresu tomak no durante ne’e empreza halo kooperasaun ho autoridade di’ak tebes.

Empreza Petrolífera ne’e halo perfurasaun ba dahuluk, bainhira kampu Bayu-undan hanesan ona parte esklusivu ida iha jurizdisaun Timor-Leste, hafoin ratifikasaun Tratadu Fronteira Marítima entre Timor-Leste no Austrália.

Durante ne’e, projetu Bayu-undan kontribui ona reseita ba Estadu Timor-Leste, ne’ebé akumula iha fundu petrolífera hamutuk biliaun $20-resin.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here