Antigu Prezidente Repúblika Portugal, Jorge Sampaio. Imajen/Epesiál

DILI, 13 setembru 2021 (TATOLI)–Parlamentu Nasionál Timor-Leste sei aprova votu pezár ba Eis Prezidente Repúblika Jorge Sampaio iha sesaun kuarta lejislativa iha 15 setembru, semana ne’e.

Notísia Relevante: Parlamentu Nasionál TL presta omenajen ba Jorge Sampaio

“Iha sesaun kuarta lejizlativa ne’ebé monu iha 15 setembru, plenária sei aprova votu pezár ba Eis Prezidente Repúblika Portugál Jorge Sampaio,” Sekretária Meza Parlamentu Nasionál, Deputada Lídia Norberta dos Santos Martins, informa ba jornalista sira hafoin reuniaun líder bankada parlamentár, iha uma fukun, segunda ne’e.

Nia dehan, órgaun soberania sira seluk aprova ona votu pezár entaun Parlamentu Nasionál mós sei halo ida-ne’e hodi fó rekuñesimentu ba Eis Prezidente Repúblika nia kontribuisaun ba Povu Timor-Leste iha prosesu luta ba libertasaun nasionál.

Entretantu, Vise-Xefe Bankada Congresso Nacional de Recontrução de Timorense (CNRT), Deputadu Patrocínio dos Reis Fernandes, hateten votu pezár ne’e importante tebes tanba Jorge Sampaio nia kontribuisaun ba Povu Timor-Leste boot tebes.

“Ne’e merese Parlamentu Nasionál tenke aprova votu pezár. Ami mós sei sai proponente ba votu pezár ne’e,” nia dehan.

Eis Prezidente Repúblika Jorge Sampaio mate iha loron sesta ne’e ho idade tinan 81. Eis Prezidente Repúblika ne’e hasoru difikuldade respiratória iha loron 27 agostu no transfere ba Lisboa.

Jorge Fernando Branco de Sampaio moris iha Lisboa iha 18 setembru 1939. Oan hosi Arnaldo Sampaio, ne’ebé koñesidu nu’udar médiku iha saúde públika, no Fernanda Bensaúde Branco de Sampaio, nu’udar profesora lian inglés.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here