Prezidente Parlamentu Nasionál (PN) Aniceto Longuinhos Guterres Lopes akompaña hosi Bispu Eméritu, Díli, Dom Carlos Filipe Ximenes Belo, SDB, presta omenajen ikus ba eis Prezidente Repúblika Portugál Jorge Sampaio, iha Lisboa, (11/09/21). Imajen Imajen Relasaun Públika PN.

DILI, 12 setembru 2021 (TATOLI)—Parlamentu Nasionál (PN) Timor-Leste (TL), liuhosi Prezidente, Aniceto Longuinhos Guterres Lopes akompaña hosi Bispu Eméritu, Díli, Dom Carlos Filipe Ximenes Belo, SDB, presta omenajen ikus ba eis Prezidente Repúblika Portugál Jorge Sampaio, iha Lisboa.

Ekipa delegasaun PN hato’o última omenajen iha tuku 16.00, oras Lisboa, sábadu ne’e, ba mate-isin ne’ebé hatoba-hela iha Mosteiro dos Jerónimos (Biara Jerónimos).

Notísia relevante:PR Lú Olo hato’o gratidaun ba kontribuisaun Jorge Sampaio

“Lori Povu no Estadu Timor-Leste nia naran ho tristeza boot ba belun boot Timor nian ne’e nia mate no hato’o mós sentindu kondolénsia kle’an ba Povu Portugés no família,” Komunikadu Imprensa ne’ebé Agência Tatoli asesu, domingu ne’e.

Hafoin halo velóriu, Prezidente Parlamentu Nasionál hato’o mensajen liuhosi ‘livro de honra’ ba matebian eis Prezidente Jorge Sampaio, tanba nu’udar belun di’ak ba povu Timor-Leste.

Prezidente Parlamentu Nasionál agradese ba kontribuisaun hotu ne’ebé maktoban halo ba Timor-Leste dezde prosesu luta ba libertasaun nasionál.

Eis Prezidente Repúblika Jorge Sampaio mate iha sesta 10  Setembru ho idade 81. Eis Prezidente Repúblika ne’e hasoru difikuldade respiratória iha loron 27 agostu no transfere ba Lisboa.

Jorge Fernando Branco de Sampaio moris iha Lisboa iha 18 setembru 1939. Oan hosi Arnaldo Sampaio, ne’ebé koñesidu nu’udár médiku iha saúde públika, no Fernanda Bensaúde Branco de Sampaio, nu’udár profesora lian Inglés.

Jornalista: Evaristo Soares Martins

Editór: Cipriano Colo

HAKEREK NO HATÁN

Please enter your comment!
Please enter your name here