Komandante Tránzitu munisípiu Dili, Inspetór Xefe, Domingos Gama. Imajen Tatoli/Nelson de Sousa.

DILI, 10 setembru 2021 (TATOLI)—Polísia Nasionál Timor-Leste (PNTL), munisípiu Dili, liuhosi Unidade Seksaun Tránzitu, liberta karreta 36, taxi 18 no mikrolete 18.

Karreta hirak-ne’e iha 09 setembru, interpreta sala oráriu sirkulasaun, hodi sirkula fali iha kapitál Dili kontra rezolusaun Governu.

Notísia relevante:Polísia tránzitu Dili halo apreensaun ba motór-karreta 138

Nune’e, Polísia Tránzitu halo apreensaun no hlao mós identifikasaun ba kontudór-sira, koordena ho Sentru Integradu Jestaun Krize (SIJK), hodi submete ba teste swab ba prevensaun COVID-19.

“Sira la obedese ba regra tanba intrepreta sala oráriu, nune’e ita halo esplikasaun maibé ita tolera no ohin dader liberta  ona no sira-nia rezultadu teste swab hotu-hotu negative,” Komandante Tránzitu munisípiu Dili, Inspetór Xefe, Domingos Gama, hateten ba jornalista-sira iha kna’ar fatin Caicoli, sesta ne’e.

Ho desizaun Governu ne’ebé la renova ona konfinamentu  domisiliáriu jerál iha Dili, autoriza hikas sirkulasaun transporte públiku hanesan mikrolete no taxi, maibé mantein regra prevensaun COVID-19  hanesan uza máskra, fase liman bebe’ik ho sabaun no distánsia fíziku.

Komandante ne’e husu mós ba populasaun ne’ebé dokumentu transporte inválidu atu ba iha Diresaun Nasionál Transporte Terreste (DNTT), hodi halo renovasaun.

Parte Tránzitu sei kontinua hala’o operasaun rutina ba sirkulasaun transporte, atu kumpre lei kódigu estrada hanesan uza espellu, xapa matríkula no uza kapasete.

Governu liuhosi reuniaun Konsellu Ministru (KM) iha kuarta 08 setembru, deside hakotu konfinamentu domisiliáriu jerál iha Dili, hahú tuku 23:59, loron 09 setembru 2021.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here