PNTL munisípiu Dili liuhosi Unidade Seksaun Tránzitu Rodaviáriu hala’o hela pasa revista iha pontu entrada Tasi-tolu, sesta (16/07/21). Imajen Tatoli/António Gonçalves.

DILI, 19 jullu 2021 (TATOLI)—Polísia Nasionál Timor-Leste (PNTL), komandu munisípiu Dili liuhosi Unidade Seksaun Tránzitu no Rodaviáriu, halo apreensaun ba motorizada 128  no karreta 10, iha semana kotuk.

Apreensaun ne’ebé polísia halo ba veíkulu sira-ne’e tanba viola lei kódigu estrada, hanesan dokumentu inválidu, la uza espellu, uza kanuresin no seluk tán.

Notísia relevante:Polísia Tránzitu halibur osan hosi infratór sira $4.220

“Hosi infratór 138, balun ba selu ona koima direta ihabanku no balun seida’uk. Hosi númeru ne’e, durante semana ida ita hatama reseita $4.497,” Komandante Tránzitu Dili, Inspetór Domingos Sarmento Gama, hateten ba jornalista-sira iha knaar-fatin Caicoli, segunda ne’e.

Nia hatutan, polísia  tránzitu kontinua halo atividade operasaun iha kapitál, hodi husu komunidade atu kumpre  nafatin  lei kódigu estrada hodi prevene asidente.

Tuir dadus, polísia  tránzitu Dili semana kotuk rejista  asidente  tráfegu hamutuk 12, kompostu hosi kanek todan ida no  restu kanek  kamán, iha kazu neen no vítima-sira hakarak rezolve tuir família, maioria asidente akontese tanba halai ho velosidade makás la kontrola ho fatór seluk tán.

Durante fulan juñu, PNTL munisípiu Dili liuhosi Unidade Seksaun Tránzitu Rodaviáriu, konsege rekolla mós  $28.316 ba kofre Estadu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here