Prezidente KRAM, Octávio da Conceiçao, hala’o sosializasaun no introdús prosesu rejistu, ba membru Grupu Arte Marsiál (GAM) Bobonaro, iha Jináziu Maliana, sesta (10/09/21). Imajen Tatoli/Sérgio da Cruz.

BOBONARO, 10 setembru 2021 (TATOLI)—Komisaun Reguladora Arte Marsiál (KRAM), kontinua fó advokasia ba Grupu Arte Marsiál (GAM), iha munisípiu Bobonaro, hodi kontinua kompleta rekezitu ba reativasaun atividade.

“KRAM sei kontinua nafatin fó advokasia ba sira atu kompleta dokumentu hodi reativa sira-nia aktividade,” Prezidente KRAM, Octávio da Conceiçao hateten lia hirak ne’e, hafoin hala’o diálogu ho Komandante Polísia Nasionál Timor Leste (PNTL), Munisípiu Bobonaro, sesta ne’e.

Notísia relevante:PSHT kompleta ona rekezitu hosi KRAM

Tuir dadus hosi KRAM katak, Grupu Arte Marsiál Persaudaraan Setia Hati Terrate (PSHT sigla Indonézia), kompleta  ona rekezitu 18 hosi KRAM, Ikatan Kera Sakti (IKS sigla Indonézia), falta rekezitu 10, no Kmanek Oan Rai Klaran (KORK) falta rekezitu 11.

Maski kompleta ona rekezitu, maibé KRAM sei avalia no sei halo fali diálogu ho líder PSHT kona-bá prosesu ba rejistu iha Ministériu Justisa (MJ), liu hosi Diresaun Nasionál Serbisu Notariadu, hafoin bele publika iha Jornal da Republika.

Tanba ne’e, KRAM husu líder GAM hotu-hotu liu-liu PSHT tenke organiza no halo kontrolu ba membru-sira hodi hatudu disiplina, nune’e KRAM deside fó autorizasaun hala’o atividade.

“Ba oin tenke koopera ho autoridade Munisípiu, instituisaun Estadu no parte seguransa, hodi kria pás no establidade iha iha munisípiu, nune’e bele hetan konfiansa hosi Governu atu deside reativa aktividade,” nia husu.

Iha fatin hanesan Konsileiru PSHT munisípiu Bobonaro, Arlindo de Oliveira, agradese ba KRAM tanba durante ne’e esforsu no fó advokasia ba líder-sira to’o prienxe ona kritéria.

KRAM iha ona planu katak, bainhira PSHT hetan ona lisensa atividade, sei kumpre kritéria hanesan, sidadaun ne’ebé atu treinu tenke hetan lisensa hosi inan-aman, aprenzenta identidade, bainhira atu ba treinu tenke tau atributu iha pasta laran no KRAM autoriza de’it iha sentru ida bele akumula ema na’in 50, kompostu hosi treinadór na’in-lima.

Bainhira la kumpre kritéria hirak-ne’e, sub KRAM ne’ebé estabelese iha munisípiu hotu, sei informa ba Polísia hodi halo kapturasaun no sei aplika lei númeru 5/2017, alende ne’e sei fó multa másimu $250.

Bandu uza atributu partisipa kampaña

Prezidente KRAM, Octávio da Conceiçao, husu ba GAM hotu-hotu ne’ebé eziste iha Timor-Leste (TL), labele involve iha kualkér atividade Partidu Polítiku (Parpol).

“Ha’u husu ba imi, eleisaun mai agora labele tuir atividade partidu polítiku, uza imi-nia atributu ba halo kampaña, di’ak liu ba hanesan sidadaun baibain,” nia hateten.

Octávio da Conceiçao husu ne’e bazeia  ba kritéria KRAM katak, GAM ne’ebé rejistadu iha KRAM, lei la autoriza atu hala’o atividade partidu uza atributu.

“Ami sei observa, durante kampaña mak detekta grupu balun, sei haruka polisia kaptura, hodi prosesa ba Tribunál, tanba kontra lei númeru 5/2017 ne’ebe bandu uza atributu GAM iha fatin públiku,” nia hateten.

PNTL apoia kontrola atividade GAM

Komandante PNTL, munisípiu Bobonaro, Superintendente, Antoninho Mauluta, dekalara katak, polisia kontinua fó apoiu ba KRAM atu halo kontrolu ba atividade GAM ne’ebé Governu planeia atu re-ativa.

Parte PNTL Bononaro mós koordena ona ho parte KRAM, iha Komandu Polísia Munisípiu Bobonaro, sesta  ne’e.

“Agora ba oin ita sei la’o hamutuk ho sub KRAM iha Bobonaro, atu kontrola grupu sira-nia atividade  iha munisipiu laran,” nia hateten.

Nia husu ba KRAM no Governu atu kria regra ne’ebé rigór no lei ne’ebé forte, atu kontrolu liuliu mensiona loloos atividade treinamentu iha kurrikulu.

“Ita sei orienta Polísia Komunitária no OPS, koordena ho autoridade lokál kada suku, tenke rejistu, atu bele hatene-tuir iha suku ne’e grupu arte marsiál hira, se mak lidera, bainhira iha problema ruma ita bolu de’it nia mai submete ba prosesu,” nia deklara.

Durante ne’e Komandu PNTL Bobonaro observa katak, GAM barak mak sempre kria instabilidade iha komunidade nia leet, maibé Polisia konsege identifika no halo kapturasaun.

Durante ne’e KRAM Nasionál rejista Grupu Arte Marsiál (GAM) hamutuk 21, iha territóriu tomak.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here