Pesoál saúde sira-ne’ebé destaka iha pontu entrada Tasi-Tolu halo hela teste swab antigen ba komunidade ne’ebé tama-sai Dili ba Munisípiu no hosi Munisípiu tama Dili, kinta (09/09/2021). Imajen Tatoli/Antonio Gonçalves.

OÉ-CUSSE, 10 setembro 2021 (TATOLI)—Sentru Informasaun COVID-19 iha Rejiaun Administrativa Espesiál Oé-Cusse Ambeno (RAEOA) sesta ne’e rejista kazu pozitivu foun na’in-tolu (3), ativu 49 no rekopera 196.

Notísia Relevante: COVID-19 iha RAEOA: pozitivu 9, ativu 46 no rekoperadu 196

“Sentru Informasaun COVID-19 RAEOA, ohin, rejista kazu pozitivu foun na’in-tolu (3), ativu hela baixa iha sala izolamentu 49, no rekoperadu na’in-196,” Sekretário Rejionál Asuntu Saúde, Manuel da Costa informa Agênsia Tatoli iha Sikluli, Oé-Cusse.

Kazu ativu 49 ne’e, daudaun ne’e sira kumpre hela iha sala izolamentu Alfandega Mahata hamutuk na’in-13, izolamentu Klinika Kurasaun na’in-rua (2), izolamentu Kitahara Mahata hamutuk na’in-29 no auto-izolamentu na’in-lima (5).

Nia informa, pasajeiru sira-ne’ebé tama Oé-Cusse kumpre hela kuarentena hamutuk 35, no sira-ne’ebé hela iha auto-kuarentena Fulolo na’in-haat (4), kuarentena Sakato na’in-ida (1), uma Dra. Catarina Anunu na’in-ida (1), kuarentena Eskola ETARO Masin na’in-26, auto-kuarentena rezidénsia Mateus Sufa na’in-ida (1), auto-kuarentena Palaban na’in-ida (1), auto-kuarentena Veronika Oématan na’in-ida (1).

Dadus pasajeiru ne’ebé kumpre kuarentena obrigatóriu 1.631, auto-kuarentena 305 ho totál hamutuk 1.936 no pasa ona loron 14 hamutuk 1.834.

Tuir dadus hosi 23 marsu 2020 to’o 09 setembru 2021, RAEOA rejista kazu óbitu ida, totál dadus komulativu kazu konfirmadu hamutuk 246, hasai teste-swab na’in-44, RDT swab 167, komulativu teste-swab 3.258, komulativu rezultadu negativu 2.989.

Dirijente saúde ne’e apela ba komunidade sira atu mantein uza máskara, fase liman beibeik no halo halo distansiamenru sosiál maske simu ona vasina dala-rua.

Jornalista : Abílio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here