Kondisaun uma ne’ebé sofre ba inundasaun ne’ebé akontese iha 04 abríl 2021, iha área Masin-lidun Tasi-tolu. Imajen Tatoli/António Gonçalves.

DILI, 09 setembru 2021 (TATOLI)—Sekretária Estadu Protesaun Sivíl (SEPS),  oferese ona materiál konstrusaun ba uma-ka’in hamutuk 1.235 iha territóriu, ne’ebé afetadu ba dezastre naturál iha 04 abríl 2021.

“Uma ne’ebé hetan estragu iha territóriu tomak hamutuk 4.472  no ita fó ona apoiu materiál konstrusaun ho osan mão de obra  ba família 1.235, família 3.237 mak seidauk simu,” Diretór Jerál SEPS, Superintendente Polísia, Ismael Babo, hateten ba jornalista Agência Tatoli iha kna’ar fatin, Caicoli, kinta ne’e.

Notísia relevante:SEPS distribui materiál konstrusaun bá vítima dezastre naturál

Hosi númeru família ne’e, maioria hosi kapitál Dili no mekanizmu apoiu ne’ebé SEPS iha maka fó ba família maibé labele konstrui fila-fali uma  iha fatin risku, hanesan mota ninin, foho lolon no lagoa ninin, nune’e prevene dezastre iha tempu tuir-mai.

Alende ne’e halo mós termu asinatura ho família afetadu, bainhira simu materiál-sira ne’e atu konstrui fila-fali uma no labele faan tutan.

SEPS identenfika hela família ne’ebé seidauk simu, maibé iha família balun ne’ebé hela iha sentru akollamentu, inklui sira ne’ebé hela iha área risku, maioria iha área lagoa Tasi-tolu.

Dezastre naturál ne’ebé akontese iha 04 abríl,  SEPS rejista família afetadu hamutuk 30.965, no fó ona apoiu emerjénsia ba afetadu 28.874, sira ne’ebé seida’uk simu hamutuk 2.091 nu’udár dadus foun ka reklamasaun ne’ebé sei iha hela faze re-verifikasaun.

SEPS Husu harii uma iha fatin seguru

Parte SEPS, prontu fó apoiu materiál konstrusaun ba família afetadu dezastre naturál, ne’ebé daudaun kontinua hela iha sentru akollamentu iha Dili, bainhira harii fali uma iha fatin seguru.

Superintendente Polísia, Ismael Babo, hateten  dekretu lei númeru 7 artigu 9 protesaun sivíl la fó dalan atu fó apoiu rekoperaun ba komunidade hodi ba harii fila-fali uma iha área risku hanesan mota ninin ho mota laran, foho leten no lagoa ninin, tanba tempu oin sei kontinua sofre nafatin ba dezastre.

Ba família sira ne’ebé identifika antes ne’e afetadu dezastre hela iha fatin risku sira ne’ebé agora nafatin hela temporáriu iha sentru akollamentu, Governu seidauk bele fó apoiu rekoperasaun.

“Família sira bainhira fila-fali tenke identifika  fatin  ruma ne’ebé titulu sira nian duni, laiha disputa, nune’e protesaun sivíl haree fila-fali rai ne’e iha futuru laiha risku ba dezastre maka imediata sei fó apoiu rekoperasaun,” Ismael Babo, hateten.

Enkuantu, família iha sentru  evakusaun sede suku Manleuana husu SEPS atu fó apoiu materiál konstrusaun ho orsamentu nune’e bele  konstrui fali uma hodi hela tanba  agora tama ona tempu udan la seguru ba sira.

Dadus  hosi  SEPS  dadaun iha  família uma-kain 131 ho membru  família 701 mak kontinua hela iha sentru  akollamentu neen hanesan Don Bosco Comoro akumula família 35, kapela Hera família 25, Igreja Parókria Hera familía 14, sede suku Manleuana 41, eis restaurante Metiaut iha sia, sentru akollamentu rate ain Canossa kotuk iha família hitu.

SEPS servisu hamutuk ho parseiru dezenvolvimentu no  organizasaun naun  governamentál-sira kontinua fó asisténsia ai-han  tuir nesesidade hanesan foos, ikan lata, mina ai-han no seluk tan kada  semana dala rua.

Tuir identifikasaun SEPS nian, família hela iha lona okos, maka hanesan  sentru evakuasaun rate ain eskola  Canossa   nia kotuk, sede suku Manleuana, ho Akanunu Hera no sira seluk  hela uma provizóriu ne’ebé konstrui hosi komunidade Salezianu.

“Situasaun ne’ebé urjente atu haree maka sede suku Manleuana ho rate ain tanba hela iha tenda ne’ebé maka direitamente loron manas  no udan kona nune’e ita  sei koordena ho liña ministeriál bele haree fila fatin alternativu balun  hanesan edifísiu públiku ka fatin Salezianu hodi bele evakua família sira ne’e,” nia dehan.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here