SEPS distribui materiál konstrusaun bá vítima dezastre naturál
COVALIMA, 13 jullu 2021 ( TATOLI) – Sekretaria Estadu Protesaun Sivíl (SEPS) Munisípiu Covalima, tersa ne’e, distribui materiál konstrusaun bá família vítima dezastre naturál iha Munisípiu Covalima.
“Materiál konstrusaun ne’ebé mak ita-boot sira simu tenke konstrui uma. Ha’u lakohi rona ita-boot sira fa’an fali materiál ne’e ”Administradór Munisípiu Covalima, Francisco de Andrade hateten iha ámbitu distribuisaun materiál konstrusaun ne’e ba vítima dezastre naturál sira.
Administradór Francisco de Andrade, orienta administradór postu to’o xefe suku sira atu tau matan bá vítima dezastre naturál sira hodi utiliza duni apoiu ne’e ba hadi’a sira-nia uma ne’ebé hetan estragu hosi dezastre iha loron 04 abríl liubá.
Koordenadór SEPS Covalima, Dinis Pereira hatutan, SEPS distribui materiál konstrusaun bá vítima dezastre naturál bazeia kondisaun uma.
“Ita haree bá nivel estragu uma katak uma aat kaman sei hetan kalén 50 ho pregu kalén, uma estraga total kalén tahan 50, simentu saku 25, pregu kalén kilograma rua (2) ho pregu séntimu 10 kilogram rua (2) ho besi,” Dinis informa.
SEPS Covalima distribui materiál konstrusaun iha postu administrativu Suai villa, Zumalai, Fatululik, Maucatar, Fatumea, no Tilomar hamutuk uma-kain 16 ho totál orsamentu $5.264
Lúcia Cardoso, vítima dezastre naturál kontente hetan ona apoiu materiál konstrusaun hosi Governu. Nune’e, nia agradese ba Governu ne’ebé bele tulun ona nia atu konstrui fali nia uma.
Jornalista : Celestina Teles
Editór : Francisco Simões
