Ministru Ensinu Superiór, Siénsia no KulturaTATOLI/ Egas Cristóvão

DILI, 09 setembru 2021 (TATOLI)–Ministru Ensinu Superiór Siénsia no Kultura (MESSK), Longuinhos dos Santos, hein hela rekomendasaun Ministériu Saúde (MS) nia atu re-ativa hikas atividade ensinu aprendizajen aula prejensiál iha instituisaun ensinu superiór tantu públiku no privadu sira.

Ministru Longuinhos dos Santos, haruka ona karta ba MS atu husu prosesu aprendizajen prejensiál bazeia bá regulasaun Governu nian, maibé tenke hetan rekomendasaun hosi MS kuandu MS la fó rekomendasaun sei laiha atividade aula prejensiál iha IES sira.

“Ha’u haruka ona karta ba MS atu hetan rekomendasaun katak atividade letiva prejensiál ba universidade públiku no privada-sira posibilidade reativa ka lae. Agora ita hein hela,” Ministru Longuinhos hateten ba jornalista sira iha Edifísiu Ministériu Fiansa, Dili, kinta ne’e.

Ministru Longuinhos afirma katak maske Konsellu Ministru hapara ona konfinamentu obrigatóriu iha Munisípiu Dili no fatin balun, maibé atu reativa atividade aula prejensiál iha Instituisaun Ensinu Superiór tantu públiku no privadu-sira presiza hetan rekomendasaun hosi MS.

Kuandu Ministériu Saúde la fó rekomendasaun atu re-ativa aula prejensiál iha IES tantu públiku no privadu sira sei laiha dalan atu hala’o liuhosi aula online.   

Jornalista : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here