Diretór Jerál MTK, Gaspar de Araújo. Imajen TATOLI/Francisco Sony

DILI, 09 setembru 2021 (TATOLI)Diretór Jerál Ministériu Transporte no Komunikasaun (MTK), Gaspar de Araújo, hateten, ró Berlin-Ramelau sei to’o Timor-Leste tinan ne’e.

“Neste momentu ha’u konfirma ba autoridade ne’ebé haree ba ró ne’e maibé seidauk asina, data atu mai Dili seidauk serteza, karik iha outubru nia laran ró ne’e mai ona,” Diretór Jerál MTK informa, iha salaun MTK, Caicoli, kinta ne’e.

Ró ne’e iha ona faze finál no téknikamente kompleta ona, tanba ne’e foin lalais halo teste tama ba tasi laran.

“Hatun ba iha tasi laran no koko ona, ne’ebé buat hotu la’o di’ak, maibé autoridade ne’ebé halo supervizaun ba ró mak seidauk asina sertifikasaun entre parseiru, tanba Timor-Leste no Alemaña halo parseria ba konstrusaun ró ne’e,” nia akresenta.

Notísia relevante: Ró Berlin-Ramelau tama tasi laran ba dahuluk iha Xina

Iha loron 31 maiu 2019, Governu Timor-Leste reprezenta hosi Ministru Transporte no Komunikasaun, José Agostinho da Silva, asina akordu ho Governu Federál Alemaña no Kompañia Estaleiru Navál ‘Damen’ hodi halo konstrusaun Ró Berlin-Ramelau.

Projetu ne’e Governu Alemaña kontribui millaun €7,8 no Timor-Leste millaun €7,1.

Tuir planu ró ne’e sei halo operasaun dahuluk iha tinan 2021, ho destinasaun hosi Dili bá Manatuto, Baucau, Lospalos no Viqueque.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here