Prezidente Konsellu Administrasaun APORTIL, Flávio Cardoso Neves. Imajen TATOLI/António Gonçalves

DILI, 10 maiu 2021 (TATOLI)—Ró Berlin Nakroma Nakroma 2 ne’ebé antes ne’e Governu atribui ona naran ‘Berlin-Ramelau’, iha segunda (10/05) ba dahuluk tama tasi laran iha Xina.

“Ró ne’e ohin halo ona lansamentu tama tasi, bele dehan 85% susesu no ró ne’e bele mai, laiha problema,” Prezidente Konsellu Administrasaun Autoridade Portuáriu Timor-Leste (APORTIL),  Flávio Cardoso Neves, hateten ba Agência TATOLI, via telefónika, segunda ne’e.

Notísia relevante: Governu atribui naran ‘Berlin-Ramelau’ ba ró pasajeiru nasionál daruak

Hafoin lansa tama tasi laran maka foin halo instalasaun ekipamentu eletróniku sira iha ró laran, hafoin Ró Berlin-Ramelau foin to’o Timor-Leste iha fulan setembru tinan ne’e.

“Tuir loloos ró ne’e mai ona iha fulan abríl tinan ne’e, maibé ita muda fali ba setembru tanba situasaun pandemia COVID-19,” nia akresenta.

Iha loron 31 maiu 2019, Governu Timor-Leste reprezenta hosi Ministru Transporte no Komunikasaun, José Agustinho da Silva, asina akordu ho Governu Federál Alemaña no Kompañia Estaleiru Navál ‘Damen’ hodi halo konstrusaun Ró Berlin-Ramelau.

Projetu ne’e Governu Alemaña kontribui millaun €7,8 no Timor-Leste millaun €7,1.

Kona-ba orsamentu ba konstrusaun Ró Berlin-Ramelau, parte Alemaña kuaze selu hotu ona no hela parte Timor-Leste maka falta de’it balun.

“Ita hatene konstrusaun ró ne’e halo kooperasaun ho Alemaña. Governu Alemaña selu hotu ona maibé ita foin selu 35%, hela de’it 15% atu kompleta hosi parte ita-nia, maibé ró ne’e tenke mai no  ita garante bainhira ró ne’e sai hosi ne’ebá maka ita bele selu sira kompletu,” nia hatutan.

Tuir planu ró ne’e sei halo operasaun dahuluk iha tinan 2021, ho destinasaun hosi Dili bá Manatuto, Baucau, Lospalos no Viqueque.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here