IADE hala'o formasaun negósiu ba formadór 20 hosi AEMTL. Imajen Tatoli/Natalino Costa

DILI, 25 janeiru 2021 (TATOLI)–Institutu Apoiu Dezenvolvimentu Emprezariál (IADE) hala’o teinamentu negósiu  emprendedorizmu ba formadór na’in-20 hosi Asosiasaun Muller Emprezariál Timor-Leste (AEMTL).

Treinamentu negósiu emprendedorizmu ne’ebé IADE fó ba membru AEMTL ne’e liuhusi programa “Jéneru Emprendedorizmu Hamutuk”, ho intensaun kapasita formadór hirak-ne’e atu iha futuru fó filafali formasaun ba  joven feto sira iha munisípiu haat hanesan Dili, Bobonaro, Ermera no Viqueque.

Hafoin abertura treinamentu, Diretór Ezekutivu IADE, Filomeno Marcelino Belo hateten treinamentu emprendedorizmu ne’e nu’udar treinamentu anuál ne’ebé IADE sempre oferese ba joven sira hodi kapasita an oinsá atu halo negósiu  liuliu iha área emprendedorizmu nian.

“Formasaun ida-ne’e hanaran Training of Trainer (TOT) ba ita-nia formadór sira ne’ebé aban bainrua sei tún fó formasaun ba labarik feto sira iha munsípiu haat,” Filomeno ba jornalista sira iha salaun João Paulo, Comoro, Dili, segunda ne’e.

Iha fatin hanesan, Ministru Koordenadór Asuntu Ekonómiku (MKAE), Joaquim Amaral haklaken programa Jéneru Emprendedorizmu Hamutuk ne’e oportunidade di’ak tanba liuhusi treinamentu ne’e formadór sira hosi AEMTL hakle’an sira-nia koñesimentu, nune’e bainhira fó fali formasaun ba formandu seluk iha vida negósiu, inkestionável.

“Ne’e oportunidade di’ak ida, atu ita-nia formadór sira hetan koñesimentu no atualiza sira-nia koñesimentu kona-ba negósiu,” nia tenik.

Governante ne’e hateten MKAE kontinua apoia inisiativa IADE nian ba iha formasaun sira tanba formasaun ne’e iha vantajen ba ema.

Entretantu, Asesór International Labour Organization (ILO), Nívio Magalhães esklarese parte ILO kontinua  fó apoiu nafatin hodi realiza formasaun sira tanba ko’alia kona-ba igualdade feto no mane ne’e iha direitu hanesan.

Formasaun ne’ebé IADE hala’o ba formadór sira hosi AEMTL na’in-20 ne’e hetan finansiamentu hosi Uniaun Europeia no ILO.

Jornalista: Natalino Costa

Editór: Xisto Freitas

HAKEREK NO HATÁN

Please enter your comment!
Please enter your name here