Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos, prezide reuniaun Konsellu Ministru extraordinária, iha Palásiu Governu, kinta (09/09). Imajen TATOLI/Egas Cristóvão

DILI, 09 setembru 2021 (TATOLI)–Governu liuhosi reuniaun Konsellu Ministru (KM) extraordinária aprova ona alterasaun dahuluk ba Dekretu Governu númeru 21/2021, loron 27 agostu, kona-ba medida ba ezekusaun deklarasaun Estadu Emerjénsia (EE), ne’ebé efetua hosi Dekretu Prezidente Repúblika númeru 69/2021, loron 24 agostu.

EE ba da-XVII abranje ba territóriu nasionál tomak no vigora entre tuku 00:00 loron 31 agostu 2021 to’o tuku 23:59 loron 29 setembru 2021.

“Ho alterasaun ne’e permite fali realizasaun eventu relijiozu, sosiál, kulturál no desportu sira, maibé tenke kumpre medida prevensaun no kontrolu COVID-19,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu iha Palásiu Governu, kinta ne’e.

Antes ne’e, iha medida ezekusaun ba períudu ne’e, Governu bandu atividade sira hotu ne’ebé implika halibur ema barak iha territóriu nasionál tomak.

Notísia relevante: Medida ezekusaun EE da-XVII bandu atividade halibur ema barak

Nune’e, medida prevensaun sira ne’ebé prevee maka mantein distánsia pelumenus metru ida ho ema seluk ne’ebé la hela hamutuk iha uma ida, uza máskara taka inus ho ibun, fase liman beibeik no bainhira hakarak tama iha instalasaun hosi utilizasaun koletiva, no la promove formasaun halibur malu barak.

“Bainhira iha ema halibur-malu, liu hosi na’in-rua tenke menus hosi metru rua entre ema sira ne’ebé halibur malu,” Ministru akresenta.

Ba realizasaun funerál, daudaun ne’e permite prezensa ema na’in sanulu ba leten iha serimónia fúnebre sira, maibé tenke kumpre protokolu saúde no kumpre medida prevensaun no kontrolu COVID-19 nian.

“Organizadór eventu sira ne’e tenke informa forsa seguransa sira kona-ba realizasaun eventu. Fiskalizasaun hosi kumprimentu regra iha diploma ne’e, kompete ba forsa seguransa sira hanesan Polísia Nasionál Timor-Leste,” Portavóz Governu subliña.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here