Reuniaun Konsellu Ministru, iha Palásiu Governu, kuarta (25/08). Imajen TATOLI/Egas Cristóvão

DILI, 25 agostu 2021 (TATOLI)–Governu liuhosi reuniaun Konsellu Ministru (KM) iha kuarta ne’e, aprova Dekretu Governu kona-ba medida ezekusaun deklarasaun Estadu Emerjénsia (EE), ne’ebé efetua hosi Dekretu Prezidente Repúblika númeru 69/2021, loron 24 agustu hodi hatán ba pandemia COVID-19.

Desizaun ne’e, ezekutivu sira foti hafoin analiza aprezentasaun pontu situasaun epidemiolójika nasionál hosi Koordenadór Sala Situasaun, Sentru Integradu Jestaun Krize (CIGC, sigla portugés).

“Medida ezekusaun Estadu emerjénsia da-XVII, kompara ho medida ezekusaun Estadu Emerjénsia anteriór, iha alterasaun ida ne’ebe oras ne’e bandu iha territóriu nasionál tomak atividade sira hotu ne’ebé implika halibur ema barak,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu, iha Palásiu Governu.

EE ne’ebé renova ona, abranje ba territóriu nasionál tomak no vigora entre tuku 00:00 loron 31 agostu 2021 to’o tuku 23:59 loron 29 setembru 2021.

Enkuantu, EE da-XVI ne’ebé sei vijente, abranje territóriu nasionál tomak no vigora entre tuku 00:00 loron 01 agostu to’o tuku 23:59 loron 30 agostu 2021.

Enkuantu, regra sira seluk mantein, liuliu obrigasaun ba indivíduu sira hotu ne’ebé hela iha Timor-Leste atu mantein distánsia pelumenus metru ida ho ema seluk.

Governu mós husu atu utiliza máskara oin, ne’ebé taka inus no ibun bainhira hakarak tama ka hela iha fatin públiku ka privadu hirak ne’ebé ema hotu uza no fase liman bainhira hakarak tama ba estabelesimentu komersiál, industriál ka prestasaun servisu sira-nia ka ba edifísiu sira ne’ebé servisu administrasaun públika funsiona.

Durante períodu EE, lisensa, autorizasaun, vistu no autorizasaun rezidénsia no aktu administrativu seluk sei válidu nafatin no la depende ba nia prazu validade.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here