Kontinuasaun diálogu entre Konsellu Nasionál Seguransa Alimentár no Soberania Ai-han Timor-Leste (KONSANTIL) ho autoridade munisipál iha salaun adiministrasaun munisípiu Viqueque, kinta ne’e (09/09/21). Imajen Tatoli/ Vitorino Lopes da Costa.

VIQUEQUE, 09 Setembru 2021 (TATOLI)—Liuhosi diálogu ho autoridade munisipál, Konsellu Nasionál Seguransa Alimentár no Soberania Ai-han Timor-Leste (KONSANTIL) hosi parte nasionál, delega adiministradór munisípiu Viqueque, Januário Soares ‘Bolly’ sai nu’udár koordenadór munisipál hodi haree serbisu alimentár no nutrisaun.

Delegasaun kompeténsia ne’e, bazeia ba dekretu lei númeru 3/2016 kona-bá desentralizasaun, nune’e iha dekretu lei númeru sia no sanulu sita katak, iha munisípiu presiza harii mós diresaun kona-bá segurasan ai-han no nutrisaun.

Notísia relevante:KONSANTIL hala’o diálogu ho grupu agrikultór Viqueque

“Atu responde ba dekretu lei ne’e, Ministériu Agrikultór no Peska (MAP) nu’udár sekretariadu ba KONSANTIL mai iha ne’e, hodi disemina informasaun. Tanba ne’e, administradór munisípiu sai koodenadór atu haree ba serbisu alimentár no nutrisaun iha munisípiu ne’e,” Diretór Jerál Kooperasaun Dezenvolvimentu Instituisionál MAP, Cesar da Cruz, hateten ba jornalista, iha salaun adiministrasaun munisípiu Viqueque, kinta ne’e.

KONSANTIL nu’udár órgaun koordenadór nível aas liu ne’ebé estabelese atu orienta inisiativa nasionál multi-sektorál seguransa ai-han no nutrisaun nian.

KONSANTIL hahú iha fulan novembru 2012, inter-ministeriál establese tanba rekezita maka’as hosi Primeiru Ministru.

Diresaun Nasionál Alimentár MAP mai atu disemina informasaun liuliu deklarasaun Comoro iha loron 16 outubru 2010, hodi hakotu hamlaha.

KONSANTIL mós parte hosi suporta Governu TL ba nasaun-sira ne’ebé ho lian Portugés hodi hadi’a situasaun seguransa ai-han no nutrisaun iha nasaun membru CPLP.

KONSANTIL ho vizaun maka kapitál umanu timorense ne’ebé saudável, ativu, livre hosi hamlaha, ki’ak no mukit, ne’ebé iha misaun definitivu atu atinji seguransa ai-han no nutrisaun no garante koordenasaun inter-ministeriál hodi sinkroniza atividade liu hosi uza rekursu ne’ebé efisiénsia no efikasia.

Iha fatin hanesan, Koodendór KONSANTIL Munisípiu Viqueque, Januário Soares ‘Bolly’, sei hala’o serbisu saida maki ha relasaun ho kargu ne’ebé nia simu, maski oras ne’e daudaun assume hela kargu hansan administradór, no sei hakaas aan atu jere serbisu ne’ebé tanba konfiansa ne’e hanesan responsabilidade boot ida.

Nune’e mós Diretora Jerál MAP, Maria Odete do Ceu Guterres, konsidera diálogu ne’e importante tanba ko’alia kona-bá sistema ai-han, oinsá  bele estabelese  sistema alimentár iha Timor-Leste.

Tanba estabelesimentu Sistema ai-han ne’e kompostu  hosi prosesu  preparasaun  rai, kuda produtu, halo koilleta, prosesamentu distribuisaun, komersializasaun to’o  konsumu, ne’ebé sei envolve ema barak.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here