Konsellu Nasionál Seguransa Alimentár no Soberania Ai-han Timor-Leste (KONSANTIL) hala’o diálogu ho grupu agrikultór-sira hosi munisípiu Viqueque kona-bá sistema ai-han nutrisaun iha Timor-Leste (TL), kuarta (08/09/21). Imajen Tatoli/ Vitorino Lopes da Costa.

VIQUEQUE, 08 setembru 2021 (TATOLI)—Konsellu Nasionál Seguransa Alimentár no Soberania Ai-han Timor-Leste (KONSANTIL) hala’o  diálogu  ho grupu agrikultór-sira hosi  munisípiu Viqueque  kona-bá sistema ai-han nutrisaun iha Timor-Leste (TL).

Objetivu hosi diálogu ne’e, atu hadi’a sistema nutrisaun nian no sosializa mós prémiu nutrisaun hosi Primeiru Ministru ba tinan 2021.

Notísia relevante:Governu TL aprezenta progresu serbisu nutrisaun nian ba membru OMS

Reprezentante Gabinete Primeiru Ministru (PM), Jaime dos Reis, esplika, prémiu nutrisaun tinan 2021 ba kotegoria lima mak hanesan, grupu hosi suku, grupu ba feto, grupu juventude,  grupu toos na’in no  grupu suporta inan.

“Dadus tinan 2020 ne’ebé lansa iha fulan jullu hanaran planu asaun nasionál konsolida nutrisaun  no seguransa ai-han iha rekorda katak 36% Timor-Leste ita má nutrisaun, ema ne’ebé badak kuaze 47.1% no isin krekas 8%, labarik todan 1.2 %,” Jaime dos Reis, hateten ba jornalista, hafoin diálogu ho grupu agrikultór-sira, iha antiga postu saúde, munisípiu Viqueque, kuarta ne’e.

Hosi dadus ne’e hatudu katak, TL sofre ba má nutrisaun no inseguransa ai-han, tanba ne’e, Primeiru Ministru oferese prémiu nutrisaun ba grupu sira hodi tau hanoin hamutuk no serbisu hamutuk hodi fó valór ba ema sira ne’ebé serbisu makas atu hadi’a má nutrisaun no seguransa ai-han iha TL.

“Agora daudaun sosializasaun hotu ami sei distribui formuláriu ba grupu  kategoria lima no ami sei loke sítiu online ida. Alende grupu-sira prienxe formuláriu sira mós bele direta liuhosi online. Ita-nia tarjetu ne’e to’o 2030 má nutrisaun 36% tenke zero,” Nia subliña.

Tarjetu ba produsaun iha prémiu nutrisaun, produsaun  agrikultór, hortikultura, haki’ak ikan, maibé   grupu garikultór-sira mak hili, maibé tenki liga ba sistema ai-han nian.  Tuir planu distribui prému iha fulan outubru, maibé sei akompaña evolusaun surtu COVID-19.

Prémiu ba manan-sira mak hanesan, manán na’in dahuluk  $5.000, daruak $3.000 no manán na’in datoluk $2.000.

Iha serimónia abertura, Diretór Serbisu Saúde munisípiu Viqueque, Francisco de Carvalho,  hateten bainhira ko’alia kona-bá ai-han la sees hosi povu agrikultór-sira, tanba sira mak sai fatór produtór no distribuidór.

Tanba ne’e, presiza koopera no serbisu hamutuk ho agrikultór-sira hodi fó formasaun nune’e prodús ai-han ne’ebé ho nutritivu.

Membru ba KONSANTIL Kompostu hosi Ministériu Saúde  (MS), Ministériu Agrikultura no Peska (MAP), Ministériu Finansa (MF), Ministériu  Edukasaun Juventude no Desportu (MEJD) no Gabinete Primeiru Ministru  hosi Unidade Apoiu Sosiedade Sivíl no Seguransa Alimentár hamutuk ho parseiru-sira hanesan FAO, OMS, WHO no UNICEF.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here