karreta funeráriu iha Liquiça avaria dezde 2020 to’o agora seidauk di’ak. Imajen Tatoli/Hortencio Sanches

DILI, 09 setembru 2021 (TATOLI)—Diretór Dirasaun Nasionál Jestaun Finansa Públika Ministériu Solidaridade Sosiál no Inkluzaaun (MSSI), Jemmy Valente dos Reis, hateten iha tinan 2022 MSSI sei sosa karreta funeráriu lima (5) hodi reforsa munisípiu Dili tanba públiku kestiona atendeimentu ba ema mate ne’e ladún di’ak.

Notísia Relevante: Administradór munisípiu sira tenke halo manutensaun ba karreta funeráriu

“Ida-ne’e ita tenke planu sosa tanba públiku kestiona hela de’it katak atendementu ba mate ladún di’ak. Tanba ne’e, ita presiza duni atu aumenta karreta funeráriu lima hodi aumenta no reforsa tula ema mate iha Dili laran ba munisípiu sira,” Jemmy Valente dos Reis ba Agência TATOLI, iha nia knaar fatin Caicoli, Dili, kinta ne’e.

Bainhira karreta ida tula sai tiha mate ida ba munisípiu ida mak derrepente mate ida iha tan ne’e susar atu atende, entaun presiza duni fasilidade ne’ebé hodi atende situasaun hirak ne’e.

“Ha’u hanoin ida-ne’e mak ministériu mós tau karreta funeráriu ne’e sai priorodade ida ba ami atu sosa, nune’e bele fasilita ita bainhira ema mate,” nia hateten.

Liga ho COVID-19, nia dehan, loro-loron ema mate barak no moras baibain sira mós mate barak iha ospitál, ho ne’e MSSI presiza duni aumenta karreta funeráriu ne’e.

Maibé, nia akresenta katak, planu ne’e tama mós ba osan adisionál MSSI nian inklui ho programa “bolsa da mãe ba jerasaun foun” ne’ebé mak MSSI husu ba KROP hamutuk millaun $6.2.

Daudaun ne’e MSSI iha karreta funeráriu 40 resin; iha Dili karreta funeráriu 13 ba atendimentu públiku no ida ba ema importante (VIP- sigla Inglés) no kada munisipiu inklui Rejiaun Administrativu Espesiál Oé-Cusse Ambeno (RAEOA) iha karreta rua (2) ne’ebé Governu sosa ona iha 2009 no 2013.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here