Dieter Jerál Ministériu Solidaridade Sosiál no Inkluzaun (MSSI), Rui Manuel Gago Exposto.Imajen Tatoli/Osória Marques.

DILI, 24 fevereiru 2021 (TATOLI)—Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, husu ba administradór munisípiu sira tuir loloos karreta funeráriu sira-ne’ebé Governu entrega ba munisípiu sira mak avaria ona presiza halo manutensaun, la’os akontese ema ruma mate atu tula mak dehan karreta avaria.

“Ha’u hatete karik iha karreta funeráriu mak avaria, tenke halo planu ba manutensaun. Bainhira ita-nia komunidade presiza karik, ita bele fasilita sira ho lalais,” Rui Manuel Gago Exposto hateten ba Agência TATOLI relasiona ho kazu labarik ida mate iha Sentru Saude Ermera ne’ebé família sira lori kous ba sira-nia uma, iha nia knaar fatin, Caicoli, Dili, kuarta ne’e.

Nia informa, karreta funeráriu iha munisípiu sira-ne’e iha hotu maibé karik iha balun mak avaria ne’e sira-nia kestaun, tanba kompeténsia hotu entrega ona ba sira inklui ho motorista kareta nian. Ida-ne’e, nia dehan, administradór Munisípiu sira mak tenke halo jestaun oinsá mak halo manutensaun ba karreta inklui kombustivel nian.

“Ha’u hanoin karreta funeráriu balun avaria tanba ita fahe kleur ona. Balun ita fahe  dezde 2016, purvolta tinan 20-resin mak entrega ba munisípiu sira. Maibé la inklui ho Rejiaun Administrativu Espesiál Oé-Cusse Ambeno (RAEOA), tanba RAEOA ita fahe antes tiha ona,” nia esplika.

Karreta funeráriu ne’ebé Governu fahe ba Munisípiu sira-ne’e, nia dehan, bazea ba dekretu lei nú. 3/2016 liga ho desentralizasaun iha setembru 2016, Ministériu Solidaridade Sosiál no Inkluzaun (MSSI) asina akordu ho interorgániku ida entre MSSI ho Ministériu Administrasaun Estatál (MAE), katak asaun sosiál ne’e MSSI entrega ba kada munisípiu atu jere.

“Kareta funeráriu, ami entrega ona ba munisípiu atu jere. Maibé depende ba Prezidente Autoridade no Administradór Munisípiu mak uza no jere,” nia dehan.

Kareta funeráriu ba nasionál nian, nia informa, iha karreta 10 ne’ebé mak kobre iha nasionál maibé dala barak mate-isin ne’e hosi munisípu mak barak liu no susar atu atende lalais ba komunidade nia pedidu sira.

“Ita-nia karreta funeráriu ne’ebé kobre ba nasionál nian ne’e iha 10 maibé lima de’it mak ativu hela no lima seluk avaria. Lima be abvaria ne’e, dauduan ne’e, iha prosesu manutensaun nia-laran. Hein katak bele di’ak lalais para bele funsiona hotu,” nia relata.

Entretantu, Diretór Sentru Saúde Munisípiu Ermera, António de Deus Fátima, hateten kona-ba kazu labarik ida mate iha Sentru Saude Ermera ne’ebé laiha karreta funeráriu atu tula ne’e, hosi parte Sentru Saúde Gleno liuhosi Seguransa Sosiál esforsu buka karreta atu tula labarik ida-ne’ebé mate maibé família lori liu tiha ba uma.

“Ami esforsu hodi Seguransa Sosiál Sentru Saúde Gleno nian buka karreta balun ne’ebé halo hela obra ida iha Hatulia B nian ne’e atu ajuda sira. Maibé iha momentu ne’ebá karreta ne’e to’o mai duni fatin, maibé família matebian lori liu tiha mate-isin ba uma. Ami esforsu nafatin, la’ós dehan ami la esforsu ida,” António de Deus Fátima hateten.

Nia hatutan, antes ne’e Sentru Saúde Gleno mós halo kontaktu ba parte nasionál hodi ajuda tula mate-isin ne’e maibé dehan kareta funeráriu nasional nian mós halo hela atendimentu ba Munisípiu seluk.

“Ami mós halo kontaktu karreta funeráriu hosi Ministériu Solidaridade Sosiál Ermera nian, atu mai tula mate-isin ne’e ba Fatubesi maibé kareta funeráriu kondisaun aat hela. Entaun, ami hein to’o sábadu dadeer, hosi Departementu Asaun Sosiál kontaktu ba Dili atu mai tula matebian ba Fatubesi maibé kareta funeráriu sira iha Dili halo hela atendementu ba Munisípiu seluk,” nia dehan.

Nia hateten, karreta funeráriu iha Saúde Munisípiu Ermera nian iha rua (2) de’it ne’ebé ida entrega hosi Governu dahuluk nian no karreta seluk oferese iha tinan 2016.

“Ne’ebé, ha’u hanoin kondisaun kaereta hirak ne’e avaria hotu ona. Tanba ne’e, ita labele tula alin oan matebian ba nia hela fatin Fatubesi,” nia esklarese.

Nia informa, matebian ne’e feto ho naran Marcia Viegas, fulan 10, transfere hosi Sentru Saúde Gisarudu no médiku iha Sentru Saúde Gleno esforsu maibé labele salva tanba kondisaun Grave entaun pasiente ne’e mate iha sesta-feira, oras tuku 21:00. Família no médiku sira kontaktu kedan ba responsável Asaun Sosial Munisípiu Ermera atu apoiu karreta funeráriu maibé karreta avária hotu.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here