Ministra Saúde (MS), Odete Maria Freitas Belo, asina plaka iha ámbitu inaugurasaun kuarentena iha fronteira Batugade no sala Intensive Care Unit (ICU), iha Ospitál Referál Maliana, munisípiu Bobonaro, sesta, (13/08/21). Imajen Tatoli/Sérgio da Cruz.

BOBONARO, 13 agostu 2021 (TATOLI)—Ministra Saúde (MS), Odete Maria Freitas Belo, inaugura kuarentena iha fronteira Batugade no sala Intensive Care Unit (ICU), iha Ospitál Referál Maliana, munisípiu Bobonaro, sesta ne’e.

Governu prepara infraestrutura hirak-ne’e atu atende populasaun bainhira infetadu COVID-19, tanba Bobonaro fronteira ho Indonézia.

Notísia relevante:MS Observa konstrusaun armazen SAMES Bobonaro

“Uma hirak-ne’e hanesan kondisaun de’it, maibé importante liu maka komunidade tenke kumpre regra protokulu saúde ne’ebé durante situasaun COVID-19,”Odete Maria Freitas Belo, hateten iha serimónia inaugurasaun.

Parte Governu agradese ba parseiru dezenvolvimentu-sira ne’ebé durante ne’e apoia ba konstrusaun infraestrutura, fasilidade protesaun pesoál ba Ministériu Saúde hodi luta kombate COVID-19 iha TL.

Ministra Saúde mós inaugura fasilidade sanitária iha pontu entrada Batugade, inklui be’e ho haris fatin rua ne’ebé kompletu ho asesiblidade ba ema ho defisiénsia.

Fasilidade hirak-ne’e apoia hosi UNICEF ho objetivu atu fasilita sidadaun-sira ne’ebé tama sai iha pontu entrada  kumpre protokulu saúde COVID-19.

Nune’e mós Sekretáriu autoridade munisipál Bobonaro, Júlio Caero, agradese ba Ministériu Saúde, ne’ebé esforsu hosi prepara kondisaun ba populasaun Bobonaro.

UNICEF apoia instala ona fasilidade prevensaun COVID-19 iha Bobonaro mak hanesan, pontu entrada Batugade, kuarentena Batugade, Maliana, izolamentu Maliana, iha munisípiu Ainaro, Seilau no izlomanetu Kami-laran.

Iha munisípiu Covalima, pontu entrada Salele, kuarentena, izolamentu no ospitál suai ho kustu $170.000.

Sala ICU COVID-19 iha Ospitál Referál Maliana konstrui hosi empreza Nimia Unipesoal lda, uma ne’e iha kuartu ida kompostu hosi kama sanulu no fasilidade médiku bele akumula pasiente na’in-sanulu ho medida 12×20 ho durasaun kontratu tinan ida hahú hosi 01 dezembru 2020, finaliza iha 24 jullu 2021, porjetu ne’e finansia hosi Orsamentu Jerál Estadu (OJE) hosi fundu COVID-19 ho totál $178.288,91.

Kuarentena Batugade iha uma Rua ho nia medida 20×8, kada uma iha kuartu 12 kompletu ho fasilidade sira hanesan, AC, kama, armáriu, inklui haris-fatin, kuarentena ne’e bele akumula ema na’in 24.

Durasaun kontratu ba konstrusaun fulan ualu hahú hosi 21 janeiru termina iha 09 agostu 2021, projetu ne’e mós finansia hosi Orsamentu Jerál Estadu, fundu COVID-19 ho montante $158.501,75.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here