Komunidade ne’ebé sai vítima inundasaun loron 04 abríl 2021 no lakon uma, kontinua hela iha lona okos, iha Manleuana, tersa (07/09). Imajen TATOLI/Francisco Sony

DILI, 08 setembru 2021 (TATOLI)–Ministru Administrasaun Estatál (MAE), Miguel Pereira de Carvalho, halo aprezentasaun iha reuniaun Konsellu Ministru (KM), kona-ba opsaun polítiku-lejizlativu subjasente ba planu kriasaun sentru akollimentu multifunsaun hodi hatán ba situasaun emerjénsia sira.

“Opsaun ne’ebé aprezenta, ho objetivu atu kria divizaun administrativa ida-idak iha munisípiu sira no Rejiaun Administratiba Oé-cusse Ambeno pelumenus infraestrutura públika ida, ne’ebé destina espesífikamente, atu serví funsaun sentru akollimentu temporáriu hosi vítima asidente grave no dezastre naturál sira,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha auditorium Ministériu Finansa, Aitarak-laran, kuarta ne’e.

Tuir Portavóz Governu, sentru akollimentu ne’e importante tanba bele fasilita hela fatin emerjénsia bá sidadaun sira ne’ebé sai vítima dezastre naturál.

Inundasaun ne’ebé akontese iha 04 abríl 2021, rezulta ema barak lakon hela fatin no obrigadu hela iha sentru akollimentu estabelesidu.

Notísia relevante: Ema na’in-731 iha sentru akollimentu neen iha Dili

Tuir dadus hosi Komisaun Interministeriál ba Protesaun Sivil no Jestaun Dezastre Naturál, ema hamutuk 731 mak daudaun ne’e sei hela iha sentru akollimentu ativu neen iha Dili.

Enkuantu, ema hamutuk na’in-34 maka mate no na’in-14 maka lakon iha nasionál, família hamutuk 30.322 maka afeta ba inundasaun, ne’ebé entre família sira ne’e, família 24.816 hosi munisípiu Dili no uma hamutuk 4.231 mak hetan estragu totál.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here