Kondisaun uma iha área Ponte Comoro 3, Dili, ne’ebé hetan estragu hosi inundasaun ne’ebé akontese domingu (04/04/2021). Imajen TATOLI/António Gonçalves.

DILI, 28 jullu 2021 (TATOLI)–Komisaun Interministeriál ba Protesaun Sivil no Jestaun Dezastre Naturál (KIPSJDN) halo aprezentasaun iha reuniaun Konsellu Ministru (KM) kona-ba ezekusaun ba deklarasaun situasaun kalamidade, hodi hanoin hikas inundasaun iha munisípiu Dili ne’ebé akontese iha madrugada loron 04 abríl liubá.

Ministru Prezidénsia Konsellu Ministru, Fidelis Manuel Leite Magalhães, haktuir, durante reuniaun ezekutivu, Ministériu Administrasaun Estatál (MAE) no Ministériu Obra Públika (MOP) ne’ebé tama komisaun, halo aprezentasaun ne’ebé hatudu impaktu inundasaun, resposta emerjénsia, no  rekupera estragu sira.

“Iha aprezentasaun hatudu, daudaun iha ema hamutuk na’in-731 maka hela iha sentru akollimentu ativu neen iha sidade Dili,” Ministru Fidelis relata hafoin reuniaun ezekutivu, iha Palásiu Governu, kuarta ne’e.

Totál ema hamutuk na’in-34 maka mate no na’in-14 maka lakon iha nasionál, família hamutuk 30.322 maka afeta ba inundasaun, ne’ebé entre família sira ne’e, família 24.816 hosi munisípiu Dili no uma hamutuk 4.231 mak hetan estragu totál.

“Tanba ne’e, ita sei dezenvolve planu harii sentru alojamentu multifunsaun hodi hatán ba situasaun emerjénsia hanesan kontribuisaun ba prosesu reorganizasaun urbana no polítika desentralizasaun administrativa no podér lokál,” Portavoz Governu ne’e dehan.

Resposta Governu durante ne’e, ba apoiu umanitáriu emerjénsia, mobiliza rekursu umanu no disponibiliza ona materiál, ekipamentu, bee no ai-han, ai-moruk no nesesidade sira-seluk ba populasaun afetada.

Enkuantu, parte obra públika hala’o ona atividade nesesária sira hanesan limpeza,  normaliza dalan públika no rekonstrusaun infraestrutura sira.

“Komisaun aprezenta mós projetu ne’ebé la’o ka sei dezenvolve iha kurtu no longu prazu, la’ós atu rezolve de’it estragu ne’ebé identifika ona, maibé atu prevene no redúz risku dezastre tuirmai no kria infraestrutura reziliente liu,” Ministru tenik.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here