Supervizór EDTL,E.P, munisípiu Bobonaro, Mário de Jesus Soares, tersa (08/09). Imajen Tatoli/Sérgio da Cruz.

BOBONARO, 08 setembru 2021 (TATOLI)—Durante semana ida, eletrisidade iha munisípiu Bobonaro mate-lakan tanba poste distribuisaun liña média tensaun elétrika, hamutuk tolu mak monu iha suku Aidabaslala, postu administrativu Atabae, kauza hosi anin boot.

Supervizór Serbisu Eletrisidade Timor-Leste, Empreza Públika (EDTL,E.P), Munisípiu Bobonaro, Mário de Jesus Soares, husu ba populasaun atu pasiénsia oitoan, hodi hein tékniku-sira hadi’a no normaliza hikas iha tempu badak.

Notísia relevante:PNTL Bobonaro re-instala CCTV ualu iha Maliana

“Iha poste tolu mak anin hamonu, ida tohar kedan no rua mak halis de’it. Ne’e mak ahi iha Maliana ho postu administrativu-sira seluk mate lakan. Ita-nia liña ne’e mai hosi sub estasaun Maumali, Liquiça,” Mário de Jesus Soares, informa ba jornalista iha kna’ar fatin, Maliana, kuarta ne’e.

Mário de Jesus Soares  rekoñese katak, desde horisehik eletrisidade mate lakan iha Maliana, maibé tanba EDTL,E.P sei utiliza sistema manuál, nune’e tékniku-sira difísil  atu detekta liu-liu bainhira avaria iha tempu kalan.

Distribuisaun liña eletrisidade ba munisípiu Bobonaro, simu hosi munisípiu Liquiça ho kapasidade 150.000, fornese ba sub estasaun Maumali, hodi distribui fila fali ba fider 1 kobre postu administrativu Lolotoe no Bobonaro, fider 2 ba postu adminiatrativu Cailaco no Maliana, fider 3 ba Balibo no Atabae.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here