Kamera CCTV, ne’ebé instaladu iha área Ospitál tuan Maliana, segunda (23/08). Imajen Tatoli/Sérgio da Cruz.

BOBONARO, 23 agostu (TATOLI)—Polísia Nasionál Timor Leste (PNTL), munisípiu Bobonaro, re-instala kamera vizilánsia Closed Curcuit Television (CCTV sígla inglés) hamutuk ualu, iha postu administrativu Maliana, nu’udár kapitál munisípiu Bobonaro.

Objetivu hosi instalasaun CCTV ne’e, atu halo gravasaun ba asidente no insidente ne’ebé akontese iha kapitál munisípiu Bobonaro.

Notísia relevante:Edifísiu públiku iha Bobonaro laiha kondisaun ba ema ho defisiénsia

“Ita monta CCTV unidade ualu ne’e iha fatin ne’ebé ita identifika no deskonfia risku ba konflitu no kontra regra tránzitu,” Komadante PNTL Bobonaro, Superintendente Antoninho Mauluta, hateten ba jornalista-sira, iha kna’ar fatin segunda ne’e.

CCTV hirak-ne’e antes ne’e instala ona, maibé la konsege funsiona ho di’ak, tanba  kompañia Telekomunikasaun Telemor ne’ebé fornese liña internete termina ona kontratu, tanba ne’e desizaun Governu kontrata fali kompañia Telkomsel, nune’e hahú re-instala atu bele tulun Polísia halo kontrollu di’ak liu tán ba atividade movimentasaun rodoviáriu no kazu krime-sira ne’ebé akontese iha kapitál Maliana.

CCTV ida ne’ebé monta iha Rotunda Maliana bele kobre to’o Ritabou parte Aeroportu, no ida seluk monta iha parte rotunda ba Holsa sei kobre to’o Soso, no ida fali iha área leten hosi rotunda kobre to’o Santa Cruz, no mós hosi Rotunda kobre to’o Ospitál tuan.

Maske instala ona iha fatin lubuk ida iha Maliana, Komandu PNTL Bobonaro mós kontinua planeia atu instala tán iha fatin balun ne’ebé konsideradu hanesan risku ba konflitu, nune’e hafásil Polísia identifika autór prinsipál ne’ebé komete kazu ruma ligadu ho krime.

Planu ne’ebé iha, iha tinan oin bainhira Governu prevee orsamentu sufisiente sei instala tán to’o merkadu Mau-Mali, ba tán iha Tunubibi no merkadu Maliana, maibé tinan ida-ne’e sei labele halo tanba limitasaun orsamentu.

Kamera vizilánsia ne’e hanesan ekipamentu teknolojia modernu, ne’ebé ajuda tebes Polísia atu deskobre kualkér krime ne’ebé akontese iha rai-laran.

Komunidade Maliana, Marcos de Aroújo, durante ne’e observa katak, kazu krime ne’ebé sempre akontese iha Maliana vila dalabarak PNTL la konsege identifika autór pronsipál, tanba simu informasaun tarde no kestaun distánsia.

Nune’e, instalasaun kamera vizilánsia ne’e bele kontribui redús kazu krime iha Maliana, no bele deskobre mós kazu sira seluk.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here