iklan

NASIONÁL, COVID-19, DILI, HEADLINE, MUNISÍPIU, SAÚDE

COVID-19, mate ida no ativu 3.631

COVID-19, mate ida no ativu 3.631

Pesoál saúde hala’o registu ba komunidade ne’ebá hala’o viajen hosi Dili ba Munisipiu no hosi munisipiu atu tama mai Dili, iha pontu entrada Kasnafar Manleuana, segunda (06/09/21). Imajen Tatoli/António Gonçalves.

DILI, 08 setembru 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu ida, pozitivu 158, rekoperadu 466 no kazu ativu 3.631.

Totál óbitu ne’ebé relata ohin,  mane ida ho idade 60, Timoroan, hela iha Dili, vasina seidauk kompletu, iha 05 setembru 2021, diagnóstikadu iha HNGV, ho sindroma insufisiénsia respiratória aguda (SIRA) tanba COVID-19.

Notisia relevante:COVID-19, mate tolu no ativu 3.941

“Loron ne’e kedan matebian hala’o tratamentu iha Lahane. Matebian i’is-kotu ohin dader, 03:52. Familia kolabora ho ekipa saúde, atu hala’o funerál tuir protokolu ne’ebé adopta iha Timor-Leste,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, kuarta ne’e.

Kazu foun ohin 158 hosi Dili 109, Baucau 17, RAEOA ualu, Ainaro ualu, Manatuto neen no munisipiu seluk hamutuk 10 kompostu hosi mane 72 no feto 86.

Hosi totál kazu detetadu foun ohin, ho idade 20-25 (11,0%) entre 12-59 na’in 120 (76%), idade 60 hamutuk 13. Hosi kazu detetadu foun ohin 40 kazu ka 25,3% sintomatiku (hatudu sintomas).

Kumulativu kazu konfirmadu sura hosi 21 marsu 2020 to’o 08 setembru 2021 hamutuk 18.046. Hosi horisehik mai ohin, teste ne’ebé Laboratóriu Nasionál Saúde halo hamutuk 495 PCR, ho detallu hanesan tuir-mai, Vijilánsia sentinela na’in 75, rastreiu ba kontaktu ka Contact tracing 83, Rastreiu Aleatóriu ka Random Screening nain 105, viájen sai-hosi serka sanitária hosi Dili 132, Viájen internasionál 12, Follow up iha kuarentena na’in 88.

Totál testes PCR ne’ebé halo horisehik 07 setembru iha munisípiu-sira seluk, RAEOA no HNGV hamutuk 420, ho detalla hanesan tuir-mai, Maubisse 20, Maliana 49, Viqueque 21, Suai 41, Baucau 105, Ermera 14, RAEOA 38, HNGV 123 no Lospalos sia.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 08 setembru tuir sistema informasaun Saúde iha Ministériu Saúde  ho totál  kumulativu 1ª doze iha Dili (74,9%) no  totál kumulativu 2ª doze  iha Dili (59,9%).

Ema ne’ebé simu ona vasina doze dahuluk iha Timor-Leste  (52,9%) no simu ona doze daruak  (28,7%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 12,3/100 mil abitante, enkuantu ba de’it munisípiu Dili, 27,1/100 mil abitante.

Ohin, munisípiu Baucau iha insidénsia 15,5/100 mil abitante, tuir kedan ho munisípiu Lautem ho insidénsia 9,0/100 mil abitante, munisípiu Covalima 8,3/100 mil abitante.

Dadus iha leten hatudu katak, insidénsia munisípiu Dili ho munisípiu Baucau tuir-tuir malu a’as-liu, iha Timor-Leste laran tomak munisípiu rua seluk – Lautem ho Covalima – mós hatudu risku a’as-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha loron  08 setembru 2021, izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu na’in 89, ho detalle hanesan tuir mai grave hamutuk na’in  17, na’in lima uza ventiladór, na’in-tolu uza CPAP-Continuous Positive Airway Pressure-,sia uza oksijéniu. Moderadu hamutuk ema na’in 56. Kaman ema na’in 16.

Husu ba populasaun iha Timor-Leste laran tomak, maski simu ona vasina, favor respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira ne’e, mak hanesan uza mascara fase liman beibeik ho sabaun ka dezinfetante ruma  evita kose liman ba matan, inus ho ibun  bainhira kumprimenta malu, la presiza ka’er liman, bensa-liman, rei-malu ka haku’ak malu evita halibur malu barak  hamri’ik ka tur do’ok husi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

iklan
iklan

Leave a Reply

iklan
error: Content is protected !!