Pesoál saúde-sira hala’o hela teste swab ba komunidade ne’ebé atu tama mai munisípiu Dili iha pontu entrada Kasnafar, segunda (06/09/21). Imajen Tatoli/António Gonçalves.

DILI, 07 setembru 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu tolu, pozitivu 190, rekoperadu 379 no kazu ativu 3.941.

Totál óbitu ne’ebé relata ohin, primeru mane ida ho idade 52, timoroan, hela iha Dili, seidauk vasina no iha 06 setembru 2021, diagnóstikadu iha HNGV, ho Sindroma Insufisiénsia Respiratória Aguda (SIRA) tanba  COVID-19.

Notisia relevante:COVID-19, mate rua no ativu 4.132

Matebian mós sofre AVC iskémiku. Matebian i’is-kotu iha 20:50, horikalan iha Vera Cruz. Familia kolabora ho ekipa saúde, atu hala’o funerál tuir protokolu ne’ebé adopta iha Timor-Leste.

Segundu, mane ida ho idade 49, timoroan, hela iha Dili, vasina kompletu Astra Zeneca, ohin madrugada diagnóstikadu iha HNGV, ho Sindroma Insufisiénsia Respiratória Aguda (SIRA), tanba  COVID-19.

Matebian hala’o tratamentu iha Vera Cruz maibé i’is-kotu ohin dader 06:55. Familia kolabora ho ekipa saúde, atu hala’o funerál tuir protokolu ne’ebé adopta iha Timor-Leste.

Terseiru feto ida ho idade 59, timoroan, hela iha Ataúro, seidauk vasina, no iha 06 setembru 2021, diagnóstikada iha Sentru Saúde Ataúro ho Sindroma Insufisiénsia Respiratória Aguda (SIRA), tanba COVID-19.

“Matebian iha istória sofre tuberkuloze, no mós anemia. Matebian i’is-kotu ohin 14:20, iha Ataúro. Familia kolabora ho ekipa saúde, atu hala’o funerál tuir protokolu ne’ebé adopta iha Timor-Leste,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, tersa ne’e.

Kazu foun ohin hamutuk 190 mai hosi Dili 122,  Baucau 25, Lautem sia, RAEOA ualu, Ainaro hitu, Bobonaro neen, no munisípiu seluk hamutuk 13 kompostu hosi mane 99 no feto 91.

Hosi totál kazu detetadu foun ohin, ho idade 20-21 (11,0%), entre tinan 12-59 na’in 159 (83,6%), idade 60 na’in 10.

Hosi kazu detetadu foun ohin 22 kazu ka 27,5% sintomatiku (hatudu sintomas). Hosi kazu detetadu foun ohin  54 (28%) iha ona vasina kompletu no 23  (12%) hetan ona vasina doze dahuluk.

Kumulativu kazu konfirmadu sura hosi 21 marsu 2020 to’o 07 setembru 2021 hamutuk 17.888. Hosi horisehik mai ohin, teste ne’ebé Laboratóriu Nasionál Saúde halo hamutuk 582 PCR, ho detallu hanesan tuir-mai, Vijilánsia sentinela na’in 24, rastreiu ba kontaktu ka Contact tracing 34, Rastreiu Aleatóriu ka Random Screening nain 81, viájen sai-hosi serka sanitária hosi Dili 229, Viájen internasionál 160, Follow up iha kuarentena na’in 54.

Totál testes PCR ne’ebé halo horisehik 06 setembru iha munisípiu-sira seluk, RAEOA no HNGV hamutuk 581, ho detalla hanesan tuir-mai, Maubisse 23, Maliana 42, Viqueque 25, Suai 32, Baucau 134, Ermera tolu, RAEOA 45, HNGV 212, Lospalos 65.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 07 setembru tuir sistema informasaun Saúde iha Ministériu Saúde ho totál  kumulativu 1ª doze iha Dili (74,8%) no totál  kumulativu 2ª doze  iha Dili (59,5%).

Ema ne’ebé simu ona vasina doze dahuluk iha Timor Leste (52,7%) no simu ona doze daruak  (28,3%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 13,0/100 mil abitante, enkuantu ba de’it munisípiu Dili,29,6/100 mil abitante.

Ohin, munisípiu Baucau iha insidénsia 15,0/100 mil abitantes, tuir kedan ho munisípiu Lautém  ho insidénsia 11,5/100 mil abitante, hafoin munisípiu Covalima ho insidénsia 10,0/100 mil abitante.

Dadus iha leten hatudu katak, insidénsia munisípiu Dili ho munisípiu Baucau tuir-tuir malu a’as-liu, iha Timor-Leste laran tomak munisípiu rua seluk – Lautem, Covalima – mós hatudu risku a’as-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha loron 07 setembru  2021, izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu na’in 96, ho detalle hanesan tuir-mai grave hamutuk na’in 12, na’in-tolu  uza ventiladór, na’in-tolu uza CPAP-Continuous Positive Airway Pressure-, neen uza oksijéniu. Moderadu hamutuk ema na’in 55. Kaman ema na’in 29.

Apela ba populasaun iha Timor-Leste laran tomak, maski karik simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e, mak hanesan uza mascara fase liman beibeik ho sabaun ka dezinfetante ruma  evita kose liman ba matan, inus ho ibun  bainhira kumprimenta malu, la presiza ka’er liman, bensa-liman, rei-malu ka haku’ak malu evita halibur malu barak  hamri’ik ka tur do’ok husi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here