Enkontru entre Administradór munisípiu Viqueque, Januario Soares Bolly ho kompañia lokál Darda no Feacefull ne’ebé manan projetu konstrusaun jardín 59 no moru adiministrasaun munisípiu Viqueque, kuarta (08/09/21). Imajen Tatoli/Vitorino Lopes da Costa.

VIQUEQUE, 08 setembru 2021 (TATOLI)— Administradór munisípiu Viqueque, Januario Soares Bolly husu kompañia lokál  Darda no  Feacefull  ne’ebé manan projetu konstrusaun  jardín 59 no moru adiministrasaun munisípiu Viqueque, tenki garante kualidade no aselera prosesu.

“Ha’u husu kompañia lokál rua ne’e tenki serbisu lais ho responsável liuliu garante kualidade,” Januário Soares Bolly, hateten ba jornalista hafoin  enkontru ho na’in ba kompañia iha salaun munisípiu Viqueque, kuarta ne’e.

Notísia relevante:10 setembru, PIDM konstrui jardín 59 Viqueque

Tuir tarjetu, konstrusaun projetu rua ne’e ho durasaun  fulan neen, maibé agora hela fulan rua ne’ebé kompañia tenki hatuur tempu serbisu ho di’ak, hodi aselera projetu ne’e bele atinje lalais, nune’e  Governu bele halo pagamentu iha 2021, bainhira la konsege maka orsamentu sei fila ba kofre Estadu.

Orsamentu ba projetu rua ne’e dispoin 100%, maibé mosu COVID-19 ko’a 60%  hodi responde ba prevensaun ne’ebé agora daudaun hela 40%.

Hosi 60% ne’e sei integra ba 2022 no kompañia ne’ebé manan ne’e sei adianta uluk 20% ho modal lokál hodi aselera prosesu konstrusaun.

“Ha’u husu dala ida tan ba kompañia aselera hodi selu 40% iha 2021 no labele dada projetu, Governu deve maka 60%,” Januário husu.

Bainhira  atraza serbisu fíziku, hodi la atinje 45% , kompañia sei la foti orsamentu tinan 2021, no sei difikulta kompañia rasik.

Iha fatin hanesan, Diretór Planu Dezenvolvimentu Integradu Munisípiu, Domingos de Carvalho, fiar katak kompañia Darda Unip Lda no Feacefull unip Lda, sei serbisu ho di’ak, tanba haree  ba dokumentu kompañia rua ne’e iha esperiénsia ona.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here