VIQUEQUE, 07 setembru 2021 (TATOLI)—Planu Integradu Dezenvolvimentu Munisípal (PIDM), sei konstrui jardín 59 iha postu administrativu Viqueque Villa, munisípiu Viqueque, iha fulan ida-ne’e nia laran.
“PIDM hosi munisípiu Viqueque iha projetu rua, projetu ida maka moru ba administrasaun munisípiu Viqueque, no jardín 59. Prosesu konstrusaun jardín 59 hahú tinan 2020 ba submisaun pra-kualifikasaun iha kompañia lubuk ida mak la liu. Tanba iha projetu rua ne’e kategória B, ba jardín 59 Esfu Unp Lda, mak sei kontrui iha fulan ne’e,” Diretór PIDM, Domingos de Carvalho, hateten ba jornalista iha knar fatin, adiministrasaun munisípiu Viqueque, tersa ne’e.
Notísia relevante:KONEKTIL kapasita profesór relijiaun morál iha Viqueque
Konstrusaun jardín 59 no moru administrasaun munisípiu Viqueque manán na’in maka kompañia Darda Unip Lda no jardín 59 Kompañia Esfu Unip Lda.
Kompañia asina ona kontratu no iha semana ne’e PIDM sei halo orientasaun ba kompañia rua ne’e, atu bele hahú konstrusaun iha 10 setembru.
Jardín 59 Viqueque ne’e rasik iha ona ninia dezeñu no kompañia sei implementa tuir dezeñu ne’ebé mak PIDM prepara.
Projetu rua ne’e ninia implementasaun hanesan ho durasaun serbisu durante loron 80, bainhira liu loron determinadu, signifika orsamentu ba fali kofre Estadu tanba loron 15 dezembru orsamentu sei fila rasik ne’ebé konstrussaun sei to’o iha fulan novembru.
Validasaun hosi Ajénsia Dezenvolvimentu Nasionál (ADN), orsamentu ba konstrusaun moru hamutuk $233.346,66 no konstrusaun jardín 59 totál fundu hamtuuk $273.301,49.
Jornalista: Vitorino Lopes da Costa
Editór: Cipriano Colo
