Boavista FC Timor

DILI, 08 setembru 2021 (TATOLI) – Klube Primeiru Divizaun Boavista FC, Timor, ofisiálmente deside taka permanente ona klube tanba problema finanseiru.

Notísia Relevante : Ferdinand Sinaga asina kontratu ho Boavista FC Timor

Desizaun ne’e deside direita hosi na’in ba klube Boavista FC Timor, Carl Yazade J. Fatima Gusmão, liuhosi pájina ofisial klube nian, kuarta ne’e.

“Liu hosi biban ida ne’e klube Boavista FC Timor hakarak informa  ofisiálmente ba família no adeptu Boavista sira hotu iha Timor laran tomak, hahú 07 setembru 2021, klube deside ona sei la partisipa Liga Futeból Timor-Leste no sei taka permanente klube ho razaun finanseiru,” na’in ba klube ne’ deklara liuhosi pájina media sosial Facebook.

Ho laran todan tebes Boavista hato’o agradese ba jogadór, família no adeptu Boavista hotu ne’ebé oferese ona tempu suporta klube bainhira jogu lao.

“Orgullu ho imi hotu nia prezensa, imi sempre iha klube nia fuan, ita sei hasoru malu fali iha tempu seluk,” nia dehan.

 Istória Boavista

Klube jigante kapitál Dili ne’e hahú iha Liga Futeból Amadora (LFA) iha 2015, iha ne’ebé ho naran Carsae FC no mai iha 2017 klube deside troka naran ba Boavista FC no kampeaun kedan ba LFA iha 2017. Maibé ohin loron tanba pandemia COVID-19 halo ekonomia rai laran monu liga mós paradu kuaze tinan rua ona halo finansiamentu klube monu no Boavista rasik deside taka ona klube.

 Jornalista   : Hotencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here