Ilustrasaun ema tuir formasaun. Imajen/Espesiál

DILI23 agostu 2021 (TATOLI)—Sentru Treinamentu Vokasionál Juventude (STVJ) Comoro sei realiza formasaun movel ba negosiante na’in30 iha munisípiu Covalima hodi bele hadi’a sira-nia negósiu iha baze.

Diretór Sentru Treinamentu Vokasionál Juventude (STVJ) Comoro, Norberto da Costa, hateten formasaun movel ne’e hanesan formasaun ida-ne’ebé sentru ne’e lori formasaun hakbesik liu ba benefisiáriu sira liu-liu ba grupu negósiante sira iha baze, nune’e sira mós bele hetan abilidade.

Tanba, nia dehan, oportunidade no distánsia sira-ne’e halo benefisiáriu sira labele atu partisipa formasaun ne’e iha nível nasionál, entaun sentru ne’e lori formasaun ne’e ba sira atu nune’e bele kapasita sira hodi bele hadi’a sira-nia negósiu.

“Objetivu hosi formasaun movel ne’e atu kapasita benefisiáriu liliu negósiante sira ho nune’e bele hadi’a di’ak liután sira-nia atendimentu, ho nune’e bele hasa’e rendimentu ba negósiu ne’ebé sira iha,” Norberto da Costa hateten ba Agência Tatoli, iha nia knaar-fatin, Comoro, Dili, segunda ne’e.

Dauudaun ne’e, formasaun refere seida’uk la’o tanbá sentru ne’e foin asina kontratu ho Sekretária Estadu Formasaun Profesional Empregu (SEFOPE) iha semana oin no sentru ne’e sei organiza fatin iha terrenu liuliu iha Suai, Loro nian.

Hafoin ne’e, iha fulan setembru ne’e, ekipa hosi sentru ne’e sei tun ba iha terrenu hodi halo formasaun ba iha benefisiáriu ka negosiante sira oinsá atu hadi’a di’ak liután sira-nia maneira negósiu nian hanesan oinsá halo atendimentu no serve ema.

“Ezemplu, iha Suai Loro, iha negósiante ne’ebé halo negósiu iha baraka ki’ik-oan, hanesan komunidade ne’ebé faan sasan iha tasi ibun nian, hosi formasaun ne’e atu hasa’e sira-nia koñesimentu iha atendimentu no serve konsumidór sira,” nia informa.

Totál benefisiáriu ne’ebé sei tuir formasaun movel hamutuk na’in-30 ne’ebé mai hosi negosiante sira-ne’ebé halo atividade negósiu iha Covalima no hosi númeru ne’e kompostu hosi joven no kaben-na’in sira.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here