Edifísiu Sentru Saúde Maliana. Imajen Tatoli/Sérgio da Cruz.

BOBONARO, 07 setembru 2021 (TATOLI)—Iha inísiu fulan setembru, taxa partisipasaun ba vasina kontra COVID-19, iha postu administrativu Maliana, munisipiu Bobonaro menus.

Hahú 01 to’o 04 setembru,  loron ida populasaun Maliana simu vasina másimu ema na’in 30 de’it, hosi númeru ne’e, totál kumulativu foin  ema na’in 93, kompara ho fulan kotuk loron ida populsaun Maliana simu vasina mínimu ema na’in 130 no másimu bele to’o ema na’in 598.

Notísia relevante:PNTL sei asegura kampaña vasina COVID-19 iha Bobonaro

Xefe Sentru Saúde Maliana,Luis Gonçalves, hateten númeru ne’e tun kauza hosi mobilizasaun no promove partisipasaun menus no komunidade konsumu nafatin  informasaun falsa.

Komunidade Maliana 40% simu ona vasina, maibé hahú fulan ida-ne’e partisipasaun komunidade menus liu. Dalaruma ita tun ba baze mós sira la mai loron ida hetan barak liu mak ema na’in 30. Ida-ne’e tanba komunidade fiar liu informasaun Hoax iha média sosiál,” Nia informa ba jonalista, iha nia kna’ar fatin, suku Ritabou, tersa ne’e.

Situasaun ne’e la’ós foin akontese iha fulan ne’e, maibé iha jullu  mós partispasaun komunidade menus, kauza hosi kazu Lour, inan Faluk Hilaria de Jesus hakotu-iis hafoin simu vasina AstraZeneca, ne’ebé halo komunidade trauma.

Iha fulan agostu ne’e, liu hosi kampaña vasina interministeriál, ne’ebé Ministru Defeza, Filomeno da Paixão de Jesus no vice Ministru Interiór, António Armindo lansa iha postu administrativu neen iha Bobonaro, konsege hasae taxa partipasaun no loron  ida populasaun Maliana 100 to’o 500 mak simu vasina.

Nia apela ba komunidade Maliana tomak, atu labele fiar informasaun falsa ne’ebé lansa iha média sosiál, tanba Governu laiha intensaun hodi vasina estraga komunidade.

Komunidade Maliana, Ana de Jesus, deklara nia rejeita simu vasina bainhira pesoál saúde-sira la halo esplikasaun klara kona-bá importánsia hosi vasina AtraZeneca.

Dadaus ne’ebé sentru saúde Maliana rekolla desde implementasaun vasina to’o loron 04 setembru, komunidade Maliana idade 18 ba leten ho komorbidade hamutuk 9.319 mak simu ona vasina AztraZeneca kompostu hosi Mane 5.353 mo feto 3.966.

Hosi númeru ne’e, na’in 6.968 simu doze dahuluk no 2.351 kompleta ona doze daruak, enkuantu totál vasina vial 1.439 mak distribui ona ba komunidade.

Tuir planu Mikro ne’ebé sentru saúde Maliana trasa, populasaun Maliana iha suku hitu hanesan, Ritabou, Raifun, Lahomea, Holsa, Odomau, Tapo-Memo no Saburai ne’ebé sai alvu atu simu vasina AstraZeneca hamutuk 17.237.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here