Komandante PNTL, munisípiu Bobonaro, Superintendente Antoninho Mau-luta. Imajen Tatoli/Sérgio da Cruz.

BOBONARO, 02 agostu 2021 (TATOLI)—Polísia Nasionál Timor-Leste (PNTL), munisípiu Bobonaro, sei fó- seguransa másima ba kampaña vasinasaun COVID-19, liuliu oferese vasina ba ema na’in 46.179 ne’ebé sei hala’o durante loron sanulu, iha munisípiu ne’e.

“Jeralmente situasaun la’o diak, maske iha problema balun, maibé ita nafatin fó seguransa ba programa ne’e hosi nasionál atu lori mai,” Komandante PNTL, munisípiu Bobonaro, Superintendente Antoninho Mau-luta, informa asuntu ne’e, durante enkontru kampaña vasinasaun Contra COVID-19, iha salaun Kámara Dioseze Maliana, segunda ne’e.

Notísia relevante:Vasina iha Bobonaro remata ho pesoál liña frente 1.292

Durante ne’e PNTL Bobonaro liuhosi seksaun Tránzitu mós iha atividade kontrolu ba movimentu ne’ebé sempre halo sosializasaun ba populasaun atu konsiensiliza oinsa abitua uza mascara, maibé durante ne’e PNTL observa katak, sidadaun barak mak la uza mascara.

“Sira hatete mai ami katak, ami lori modo futun ida ba merkadu atu faan, haruka ami hola mascara, entaun osan hira mak ami atu lori fila ba uma. Situasaun ne’e mak halo ami PNTL mós hasoru difikuldade iha terrenu,” nia esplika.

Governu atu aselera kampaña vasina iha munisipiu Bobonaro, hare ba kobertura vasina foin atinje de’it 21,8%, kompara ho munisípiu sira seluk, balun atinje ona  49% to’o 64,7%, ho pursentu mínimu ne’e seidauk bele garante populasaun iha Fronteira bele luta kontra COVID-19.

Bazeia ba planu Mikro ne’ebé Ministériu Saúde prepara, sei instala postu vasinasaun hamutuk 199 iha postu administrativu neen iha munisipiu Bobonaro no PNTL mós sei apoia seguransa iha kada postu vasinasaun koloka membru na’in-ida.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here