Pesoál saúde-sira hala’o hela teste swab ba komunidade ne’ebé atu tama Munisípiu Dili iha pontu entrada Kasnafar, segunda (06/09/21). Imajen Tatoli/António Gonçalves.

DILI, 06 setembru 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu rua, pozitivu 80, rekoperadu 130 no kazu ativu 4.132.

Totál óbitu ne’ebé relata ohin, dahuluk feto ida ho idade 76, timoroan, hela iha Maliana, seidauk vasina, no iha 31 agostu 2021, diagnóstikada iha Ospitál Referénsia Maliana, ho Sindroma Insufisiénsia Respiratória Aguda (SIRA), tanba COVID-19.

Notísia relevante:COVID-19: óbitu haat, pozitivu 89 no kazu ativu 4.261

Matebian sofre mós diabetes, iha istória tratamentu tuberkuloze pulmonar, istória AVC iskémiku ho hipertensaun.

Matebian iis-kotu horiseik 11:00 no família kolabora ho ekipa saúde, atu hala’o funerál tuir protokolu ne’ebé adopta iha Timor-Leste.

Daruak, feto ida ho idade 64, timoroan, hela iha Dili, seidauk vasina, no iha 25 agostu 2021 diagnóstikada iha HNGV, ho Sindroma Insufisiénsia Respiratória Aguda (SIRA), tanba COVID-19.

“Iha loron ne’e kedan matebian hala’o tratamentu iha Lahane. Matebian iis-kotu ohin dader 11:55. Familia koordena ona ho ekipa saúde atu hala’o funerál tuir protokolu ne’ebé adopta iha Timor-Leste,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, segunda ne’e.

Kazu foun ohin 80 mai hosi Dili 56,  Baucau 12, RAEOA 10 no munisipiu seluk hamutuk rua ne’ebé kompostu hosi mane 35 no feto 45.

Hosi totál kazu detetadu foun ohin, ho idade 12-59 na’in 62 (77,5%), idade 60 mai karaik  na’in 11. Hosi kazu detetadu foun ohin 22 kazu  ka 27,5% sintomátiku (hatudu sintomas).

Kumulativu kazu konfirmadu sura hosi 21 marsu 2020 to’o 06 setembru 2021 hamutuk 17.698. Hosi horisehik mai ohin, teste ne’ebé Laboratóriu Nasionál Saúde halo hamutuk 275 PCR, ho detallu hanesan tuir-mai, Vijilánsia sentinela na’in 20, rastreiu ba kontaktu ka Contact tracing 31,  Rastreiu Aleatóriu  ka Random Screening nain 54, viájen sai-hosi serka sanitária hosi Dili 50,  Viájen internasionál ida, Follow up iha kuarentena na’in 119.

Totál testes PCR ne’ebé halo horisehik 05  setembru iha munisípiu-sira seluk, RAEOA no HNGV hamutuk 287 ho  detalla hanesan tuir-mai, Maubisse 24, Maliana 11, Viqueque  laiha, Suai 15, Baucau 71, Ermera laiha,  RAEOA 27, HNGV 128 no Lospalos 11.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 06 setembru tuir sistema informasaun Saúde iha Ministériu Saúde  ho totál  kumulativu 1ª doze iha Dili (74,7%) no totál  kumulativu 2ª doze  iha Dili (59,1%).

Ema ne’ebé simu ona vasina doze dahuluk iha Timor Leste (52,5%) no simu ona doze daruak  (27,8%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 12,8/100 mil abitante, enkuantu ba deit munisípiu Dili,29,5/100 mil abitante.

Ohin, munisípiu Baucau iha insidénsia 14,4/100 mil abitante, tuir kedan ho munisípiu Covalima  ho insidénsia 9,9/100 mil abitante, hafoin munisípiu Lautem ho insidénsia 9,6/100 mil abitante no munisípiu Bobonaro  ho insidensia 7,1/100 mil.

Dadus iha leten hatudu katak, insidénsia munisípiu Dili ho munisípiu Baucau tuir-tuir malu a’as-liu, iha Timor-Leste laran tomak no munisípiu rua seluk – Viqueque, Lautem no Bobonaro – mós hatudu risku a’as-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha loron 06  setembru  de 2021, izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu na’in 91, ho detalle hanesan tuir mai grave hamutuk na’in  11, na’in-rua  uza ventiladór, na’in-tolu uza CPAP-Continuous Positive Airway Pressure-, neen uza oksijéniu. Moderadu hamutuk ema na’in 60. Kaman ema na’in 20.

Apela ba populasaun iha Timor-Leste laran tomak, maski simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e mak hanesan uza mascara, fase liman beibeik ho sabaun ka dezinfektante ruma, evita kose liman ba matan, inus ho ibun bainhira kumprimenta-malu, la presiza ka’er-liman, bensa-liman, rei-malu ka haku’ak-malu evita halibur-malu barak, hamri’ik ka tur do’ok hosi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here