Prezidente Parlamentu Nasionál, Aniceto Longuinhos Guterres Lopez.

DILI, 24 agostu 2021 (TATOLI)—Parlamentu Nasionál (PN) tersa ne’e hamoos ona númeru 2 artigu 17 hosi alterasaun dahuluk Lei Resensiamentu Eleitorál tanba kontra artigu 38 iha Konstituisaun RDTL.

Notísia Relevante: PN sei diskute hikas alterasaun lei resensiamentu eleitorál vetadu

Ho akordaun Tribunál Rekursu nian nune’e iha loron 11 agostu Prezidente Repúblika veta diploma ne’e no haruka fila ba Parlamentu Nasionál, nune’e Prezidente Parlamentu Nasionál, Deputadu Aniceto Longuinhos Guterres Lopes, aprezenta ba plenária atu deputadu sira halo diskusaun hafoin halo aprovasaun.

Durante diskusaun iha plenária, bankada parlamentár sira kompostu hosi FRETILIN, CNRT, PLP, PD, KHUNTO, UDT, Frente-Mudança no PUDD konkorda hamoos (expurgação) númeru 2 artigu 17 hosi Lei Resensiamentu Eleitorál tanba Supremu Tribunál Justisa/Tribunál Rekursu julga ona inkonstitusionál.

Nune’e bankada parlamentár sira konkorda halo eliminasaun ba númeru 2 hosi artigu 17 ho rezultadu votasaun a-favór 43, kontra 0 no abstensaun 0.

“Ho votu expurgação (hamoos) ne’e ita halo ona konfirmasaun ba artigu ne’ebé inkonstitusionál no prosesu hotu iha-ne’e ona, ita la ba tán espesialidade no finál globál, depois haruka ba Komisaun A hodi halo redasaun finál,” Prezidente Parlamentu Nasionál, anunsia liuhosi plenária.

Parlamentu Nasionál halo konfirmasaun tanba iha 6 agostu 2021, Prezidente Repúblika Francisco Guterres Lú Olo, hafoin Tribunal Rekursu deklara inkonsitusionalidade ba artigu 17 númeru 2, veta Dekretu Parlamentu Nasionál númeru 43/V-primeira alterasaun ba Lei númeru 6/2016, 25 maiu, Lei Resenseamentu Eleitorál.

Liuhusi análize ba Dekretu Parlamentu Nasionál ne’e, iha 23 jullu, Prezidente Repúblika hato’o pedidu ba Tribunal Rekursu halo fiskalizasaun preventiva ba konstitusionalidade Dekretu Parlamentu Nasionál nian.

Iha 6 agostu 2021, Tribunal Rekursu deklara artigu 17 númeru 2 husi Dekretu Parlamentu Nasionál mak Inkonstitusionál.

Iha akordaun Tribunal Rekursu hateten artigu 17 númeru 2 husi Dekretu Parlamentu Nasionál konfronta ho artigu 38 husi Konstituisaun, viola direitu ba klarifikasaun kona-ba finalidade ba dadus sira.

Enkuantu hakat liu direitu ba koñesimentu ba dadus pesoál, ne’e viola prinsípiu ba espesifikasaun ba finalidade no limitasaun ba uzu, ne’ebé hateten iha artigu 38 husi Konstituisaun, introdús restrisaun ne’ebé bele vulnera, ho dalan injustifikadu no ho forma la proporsionál, tuir direitus ne’ebé previstu iha artigu 38 Konstituisaun.

Entretantu akordaun Tribunal Rekursu nian deside katak artigu 17 númeru 2 hosi Dekretu Parlamentu ne’ebé hateten Diretór Jerál STAE autoriza komunikasaun dadus konstante sira husi Baze de Dadus Resenseamentu Eletorál ho instituisaun bankária, finanseira no telekomunikasaun ne’ebé hetan lisensa iha territóriu nasionál, ba efeitu verifikasaun identidade, rezidénsia, inskrisaun iha Baze de Dadus Resenseamentu Eletorál.

Nune’e mós númeru kartaun eleitór hosi kliente sira iha ámbitu operasaun no prosedimentu kontrolu internu ba indentifikasaun kliente, no ba prevensaun brankamentu kapitál no hosi finansiamentu terrorizmu.

Prezidente Repúblika konsidera artigu ida-ne’e la tuir Konstituisaun artigu númeru 38 ne’ebé garante direitu ba liberdade, seguransa no integridade ema ida-idak ninian.

Supremu Tribunál Justisa/Tribunál Rekursu julga ona inkonstitusionál tanba númeru 2 artigu 17 hosi alterasaun dahuluk Lei Resensiamentu Eleitorál kontra Konstituisaun RDTL artigu 38 (Protesaun ba informasaun ema idak-idak nian) ne’ebé previstu iha númeru 1 katak, sidadaun hotu-hotu iha direitu atu bele hetan dadus informatizadu kona-ba sira-nia an rasik eh ne’ebé hatama ona iha rejistu mekanográfiku no manuál kona-ba sira-nia an, bele husu atu halo retifikasaun no atualizasaun ruma ba informasaun hirak ne’e no iha mós direitu atu buka hatene informasaun hirak ne’e nia finalidade.

Númeru 2 hosi artigu ne’e esplika, Lei mak define loloos konseitu kona-ba informasaun ema idak-idak ninian no kondisaun atu trata didi’ak informasaun ne’e.

Nune’e mós númeru 3 hosi artigu 38 ne’e bandu tebetebes halo tratamentu informatizadu kona-ba vida partikulár, konviksaun polítika no filozofia nian, relijiaun, no filiasaun iha partidu polítiku eh sindikatu no orijen étnika wainhira la iha lisensa husi dadus ne’e nia na’in.

Ho veta konstitusionalidade ne’e, uma fukun haktuir ba Rejimentu Parlamentu Nasionál (Veto tanba inkonstitusionalidade) artigu 117 númeru 2 hateten, votasaun iha jeneralidade bele foka ba hamoos (expurgação) norma ne’ebé Supremu Tribunál Justisa julga ona inkonstitusionál ka bele foka ba konfirmasaun dekretu.

Nune’e mós númeru 3 dehan, textu ne’ebé iha deliberasaun daruak sai nu’udar objetu atu hamoos norma ne’ebé julga tiha ona inkonstitusionál, sei fila ba komisaun atu halo redasaun finál.

Númeru 4 hosi artigu 117 katak, karik Parlamentu hamoos norma sira-ne’ebé konsidera nu’udar inkonstitusional ka konfirma nia dekretu, dekretu ne’e sei haruka ba Prezidente Repúblika atu promulga iha loron 8 nia laran.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here